برطانیہ میں گرمی کا نیا ریکارڈ، سال 2026 تاریخ کا گرم ترین سیزن قرار

برطانیہ میں جاری گرمی کی طویل لہر کے تناظر میں محکمہ موسمیات کے اعداد و شمار سے یہ بات سامنے آنے کا قوی امکان ہے کہ سال 2026 کا موسم گرما ملک کی تاریخ کا اب تک کا سب سے گرم ترین موسم گرما قرار پائے گا۔ موسم گرما کے دوران مسلسل اور غیر معمولی درجہ حرارت نے پچھلے تمام ریکارڈز پیچھے چھوڑ دیے ہیں۔ ماہرینِ موسمیات کے مطابق اس سے قبل قائم ہونے والا ریکارڈ جو سال 2025 میں بنا تھا، اس بار ٹوٹ چکا ہے اور مسلسل گرمی کے دنوں نے ماحول پر گہرے اثرات مرتب کیے ہیں۔ محکمہ موسمیات کی جانب سے منگل کے روز جاری کیے جانے والے اعداد و شمار میں اس بات کی باضابطہ تصدیق متوقع ہے کہ حالیہ موسم گرما کے دوران درجہ حرارت معمول سے کافی زیادہ رہا۔ ملک کے بیشتر حصوں میں شدید حبس اور گرمی کی لہر نے عام زندگی کو بھی متاثر کیا، جس کے باعث شہریوں کو شدید مشکلات کا سامنا کرنا پڑا۔ ماہرین کا ماننا ہے کہ موسمیاتی تبدیلیوں کے اثرات دنیا بھر کی طرح برطانیہ میں بھی شدت کے ساتھ ظاہر ہو رہے ہیں، جو اس بات کی علامت ہیں کہ آنے والے سالوں میں درجہ حرارت میں مزید اضافہ ہو سکتا ہے۔ اس صورتحال نے ماہرینِ ماحولیات اور حکومتی اداروں کو ایک بار پھر سوچنے پر مجبور کر دیا ہے کہ بڑھتے ہوئے درجہ حرارت سے نمٹنے کے لیے فوری اور مؤثر اقدامات کیے جائیں۔ اسکولوں، کاروباری مراکز اور طبی اداروں کو بھی شدید گرمی کی لہر کے دوران خصوصی ہدایات جاری کی گئی تھیں تاکہ شہریوں کی صحت کو محفوظ بنایا جا سکے۔ آنے والے دنوں میں اس موسمیاتی رپورٹ کے بعد ماحولیاتی پالیسیوں میں تبدیلی اور کاربن کے اخراج کو کم کرنے کے لیے مزید اقدامات پر زور دیے جانے کا امکان ہے۔