فچ نے پاکستان کے نئے ڈالر بانڈز کو بی مائنس ریٹنگ دیدی

بین الاقوامی شہرت یافتہ ریٹنگ ایجنسی فچ ریٹنگز نے پاکستان کے مجوزہ امریکی ڈالر کے بانڈز کو 'بی مائنس' (B-) کی ریٹنگ تفویض کی ہے۔ اس پیش رفت کے بعد پاکستان کی جانب سے بین الاقوامی کیپیٹل مارکیٹ میں فنڈز کے حصول کے لیے کوششیں مزید تیز ہو گئی ہیں، جہاں ملک نے پانچ اور دس سالہ مدت پر مشتمل ڈوئل ٹرانش ڈالر بانڈز جاری کرنے کا عمل شروع کر دیا ہے۔ معاشی ماہرین کے مطابق اس اقدام سے ملکی زرمبادلہ کے ذخائر کو بہتر بنانے اور بیرونی مالیاتی ضروریات کو پورا کرنے میں خاطر خواہ مدد ملے گی۔ اقتصادی ذرائع کے حوالے سے بتایا گیا ہے کہ اس حوالے سے متعلقہ بینکوں کو مینڈیٹ دے دیا گیا ہے اور بانڈز کی مارکیٹنگ اور اجرا کا عمل بھی تسلسل کے ساتھ آگے بڑھ رہا ہے۔ حکومتِ پاکستان کی کوشش ہے کہ بین الاقوامی سرمایہ کاروں کا اعتماد بحال رکھا جائے تاکہ ملک میں غیر ملکی سرمایہ کاری کی راہ ہموار ہو سکے۔ دوسری جانب مالیاتی تجزیہ کاروں کا کہنا ہے کہ فچ کی طرف سے دی گئی یہ ریٹنگ پاکستان کے لیے ایک اہم اشارہ ہے، جو عالمی مالیاتی منڈیوں میں ملک کی قرض لینے کی صلاحیت اور معاشی سمت کا احاطہ کرتی ہے۔ اس عمل کے مکمل ہونے سے پاکستان کو عالمی سرمایہ کاری کے نئے ذرائع تک رسائی حاصل ہوگی، جو موجودہ معاشی چیلنجز سے نمٹنے کے لیے انتہائی اہمیت کے حامل ہیں۔