پاکستان اور کرغزستان کے درمیان تجارت بڑھانے کا معاہدہ طے پایا

پاکستان اور کرغزستان نے دو طرفہ تجارت کو اگلے دو سالوں میں بڑھا کر 20 کروڑ ڈالر تک پہنچانے کے لیے ایک اہم معاہدے پر دستخط کر دیے ہیں۔ یہ معاہدہ وزیراعظم شہباز شریف اور ان کے وفد کے تین روزہ دورے کے اختتام پر بشقیک میں طے پایا۔ تقریب سے خطاب کرتے ہوئے وزیراعظم شہباز شریف نے بتایا کہ دونوں ممالک کے درمیان پہلے ایک مفاہمت کی یادداشت (ایم او یو) پر دستخط کرنے کی تجویز تھی، تاہم انہوں نے کرغز صدر صدر جباروف سے درخواست کی کہ اسے باضابطہ معاہدے میں تبدیل کیا جائے تاکہ اس ہدف کے حصول کو یقینی بنایا جا سکے۔ وزیراعظم نے مشترکہ پریس کانفرنس سے خطاب کرتے ہوئے کہا کہ اس وقت پاکستان اور کرغزستان کے درمیان دو طرفہ تجارت کا حجم لگ بھگ 16 ملین ڈالر ہے، جو دونوں برادر ممالک کے مضبوط اور تاریخی تعلقات کے تناسب سے بہت کم ہے۔ انہوں نے کہا کہ دونوں فریقین نے اقتصادی شراکت داری کو مزید عملی اور نتیجہ خیز مرحلے میں داخل کرنے کا عزم کیا ہے اور اس مقصد کے لیے ایک جامع لائحہ عمل پر کام کیا جا رہا ہے تاکہ تجارتی میکانزم کو بہتر بنایا جا سکے، سرمایہ کاری کے مشترکہ منصوبے شروع کیے جائیں اور کاروباری طبقے کے درمیان براہ راست رابطے بڑھائے جائیں۔ دونوں رہنماؤں کے درمیان ہونے والی ملاقات میں علاقائی رابطہ کاری، توانائی کے شعبے میں تعاون اور ٹرانزٹ ٹریڈ کے امور پر بھی تفصیلی تبادلہ خیال کیا گیا۔ وزیراعظم نے کسا-1000 پروجیکٹ کی بروقت تکمیل کی اہمیت پر زور دیا اور بجلی، پن بجلی اور قابل تجدید توانائی کے شعبوں میں تعاون کے لیے مشترکہ ورکنگ گروپ کے قیام کا خیرمقدم کیا۔ اس کے علاوہ تعلیم، سائنس و ٹیکنالوجی، صحت، ثقافت اور سیاحت کے شعبوں میں بھی باہمی تعاون کو فروغ دینے پر اتفاق کیا گیا جبکہ لاہور اور اوش کو جڑواں شہر قرار دینے کے فیصلے کو بھی سراہا گیا۔ وزیراعظم شہباز شریف نے سکیورٹی اور دفاعی تعاون پر بھی روشنی ڈالی اور دہشت گردی، انتہا پسندی کے خلاف مشترکہ جنگ جاری رکھنے کے عزم کا اعادہ کیا۔ انہوں نے کرغز صدر کو پاکستان کے دورے کی دعوت بھی دی اور کرغزستان کی جانب سے اقوام متحدہ کی سلامتی کونسل کے غیر مستقل رکن منتخب ہونے، شنگھائی تعاون تنظیم کی صدارت اور ورلڈ نوماڈ گیمز کے کامیاب انعقاد پر مبارکباد پیش کی۔