برطانیہ میں اوبَر کی پہلی خودکار روبوٹ ٹیکسی سروس شروع

معروف عالمی رائیڈ ہیلنگ کمپنی اوبَر نے برطانیہ میں نقل و حمل کی دنیا میں ایک نئے دور کا آغاز کرتے ہوئے ملک کی پہلی خودکار روبوٹ ٹیکسی سروس باضابطہ طور پر لانچ کر دی ہے۔ اس جدید منصوبے کے تحت ابتدائی طور پر پندرہ سیلف ڈرائیونگ ٹیکسیوں کو سڑکوں پر اتارا گیا ہے جو جدید ترین ٹیکنالوجی اور سینسرز سے لیس ہیں تاکہ سفر کو زیادہ سے زیادہ محفوظ اور باسہولت بنایا جا سکے۔ اگرچہ یہ گاڑیاں خودکار نظام کے تحت چلنے کی صلاحیت رکھتی ہیں، تاہم ابتدائی مرحلے اور حفاظتی اقدامات کے پیش نظر ہر گاڑی کے اندر ایک انسانی سیفٹی ڈرائیور بھی موجود ہوگا۔ اس کا مقصد کسی بھی ہنگامی صورتحال میں بروقت کنٹرول سنبھالنا اور مسافروں کے اندر خودکار نظام پر اعتماد بحال کرنا ہے۔ کمپنی کا ماننا ہے کہ یہ ہائبرڈ اپروچ مستقبل میں مکمل طور پر بغیر ڈرائیور کے چلنے والی گاڑیوں کی راہ ہموار کرے گی۔ ذرائع کے مطابق ان گاڑیوں میں جدید ترین کیمرے، ریڈار اور مصنوعی ذہانت کا استعمال کیا گیا ہے جو اردگرد کے ماحول، ٹریفک کے اشاروں اور پیدل چلنے والوں کو انتہائی باریک بینی سے مانیٹر کرتے ہیں۔ اس ٹیکنالوجی کی بدولت گاڑی خود بخود فیصل کرتی ہے کہ کب بریک لگانی ہے اور کس طرح محفوظ طریقے سے لین تبدیل کرنی ہے۔ مسافر اس سروس کو روایتی اوبَر ایپ کے ذریعے ہی بک کر سکیں گے۔ ٹیکنالوجی کے ماہرین اور شہری حلقوں کی جانب سے اس اقدام کو سراہا جا رہا ہے جبکہ بعض حلقوں کی طرف سے سڑکوں پر خودکار گاڑیوں کی سیکیورٹی کے حوالے سے سوالات بھی اٹھائے جا رہے ہیں۔ اوبَر کا عزم ہے کہ وہ حکومتی اداروں کے ساتھ مل کر تمام حفاظتی ضوابط کو یقینی بنائے گی تاکہ آنے والے وقت میں برطانوی عوام کے لیے نقل و حمل کے اس جدید ترین ذریعہ کو مزید وسعت دی جا سکے۔