اسلام آباد ہائی کورٹ کا اڈیالہ جیل کے قیدیوں کے حقوق سے متعلق فیصلہ

اسلام آباد ہائی کورٹ نے رواں ہفتے ایک اہم فیصلے میں سابق وزیراعظم عمران خان اور سابق خاتون اول بشریٰ بیبی کو اڈیالہ جیل میں دی جانے والی سہولیات اور ان کی قید کے حالات سے متعلق دائر دو درخواستوں پر احکامات جاری کیے۔ عدالت نے جیل سپرنٹنڈنٹ کو ہدایت کی ہے کہ وہ یقینی بنائیں کہ دونوں قیدیوں کو وہ تمام مراعات دی جائیں جن کے وہ قواعد کے مطابق حق دار ہیں اور اس بات کو بھی یقینی بنایا جائے کہ ان میں سے کسی کو بھی تنہائی میں نہ رکھا جائے۔ یہ بات انتہائی تشویش ناک ہے کہ اگرچہ جیل حکام اور سرکاری نمائندے مسلسل اس بات کی تردید کرتے رہے ہیں کہ دونوں قیدیوں کو طویل عرصے تک تنہائی میں رکھا گیا ہے، تاہم حکام کی طرف سے جمع کروائے گئے طبی ریکارڈ سے یہ بات سامنے آئی ہے کہ تنہائی کے اثرات کی وجہ سے سابق وزیراعظم کی جسمانی صحت متاثر ہونا شروع ہو گئی ہے۔ عدالت نے اپنے فیصلے میں اس امر کا اعتراف کیا کہ یہ ایک تسلیم شدہ حقیقت ہے کہ عام قیدیوں کی ان کی رہائش گاہ تک رسائی کو کافی حد تک محدود کیا گیا ہے جس کی وجہ سے ان کا بامقصد سماجی میل جول بھی محدود ہو گیا ہے۔ عدالت کے مطابق طبی ریکارڈ سے یہ بات واضح ہوتی ہے کہ محدود سماجی اور خاندانی میل جول قیدی کی نفسیاتی اور جسمانی صحت پر منفی اثرات مرتب کر رہا ہے۔ جیسا کہ عدالت نے بجا طور پر نشاندہی کی ہے کہ قیدی کا زندگی، وقار اور انسانی سلوک کا حق جیل کے دروازے پر ختم نہیں ہو جاتا۔ پاکستانی جیلوں کا نظام چلانے والے اس بنیادی اصول کو سمجھنے میں اکثر ناکام نظر آتے ہیں۔ قانون چاہے کسی بھی جرم کی کتنی ہی سخت سزا کیوں نہ تجویز کرے، لیکن اس کا یہ مطلب ہرگز نہیں ہے کہ جیل حکام قیدیوں کے ساتھ اپنی مرضی کا غیر انسانی سلوک کریں۔ بدقسمتی سے پاکستان کے اکثر قیدیوں کو قانون اور انصاف کے تقاضوں سے کہیں زیادہ سزائیں دی جاتی ہیں اور ان کے ساتھ ہونے والی ناانصافیوں کا ازالہ بھی بہت کم ہی ہوتا ہے۔ ایک طاقتور سیاسی رہنما کا جیل میں اس طرح تکلیف اٹھانا دراصل ہمارے پورے نظامِ زنداں کی بڑی خرابی کی صرف ایک علامت ہے۔ ہمارے تعزیراتی نظام کو وقتی اور ہنگامی فیصلوں کی نہیں بلکہ ایک مکمل اصلاح کی ضرورت ہے تاکہ اسے اذیت دینے کا ذریعہ بننے کے بجائے حقیقی معنوں میں انصاف کا آلہ بنایا جا سکے، جس سے ہر قیدی کے بنیادی حقوق کا تحفظ ممکن ہو سکے۔