پاک افغان سرحد پر سکیورٹی فورسز کا آپریشن، 15 دہشت گرد ہلاک

راولپنڈی: پاک فوج کے شعبہ تعلقات عامہ (آئی ایس پی آر) نے بتایا ہے کہ سکیورٹی فورسز نے پاک افغان سرحد پر بروقت کارروائی کرتے ہوئے دراندازی کی ایک بڑی کوشش ناکام بنا دی ہے اور فتنہ الخوارج سے تعلق رکھنے والے 15 بھارتی حمایت یافتہ دہشت گردوں کو ہلاک کر دیا ہے۔ پاک فوج کے ترجمان ادارے کے مطابق یہ دہشت گرد پاکستان میں داخل ہو کر امن و امان کی صورتحال کو خراب کرنے اور اہم تنصیبات کو نشانہ بنانے کی گھناؤنی سازش کر رہے تھے جسے سکیورٹی فورسز نے پیشہ ورانہ مہارت کے ساتھ ناکام بنا دیا۔ ترجمان کا کہنا ہے کہ کارروائی کے دوران دہشت گردوں کے قبضے سے بھاری مقدار میں اسلحہ، گولہ بارود اور دھماکہ خیز مواد بھی برآمد کیا گیا ہے۔ پاکستان اس بات پر مسلسل زور دیتا رہا ہے کہ افغان سرزمین پاکستان کے خلاف دہشت گردی کے لیے استعمال ہو رہی ہے اور موجودہ واقعے نے ایک بار پھر اس تشویش کو سچ ثابت کر دیا ہے۔ آئی ایس پی آر کے مطابق علاقے میں کسی بھی مزید خطرے کے خاتمے اور کلیئرنس کے لیے سینیٹائزیشن آپریشن جاری ہے تاکہ اس بات کو یقینی بنایا جا سکے کہ کوئی اور دہشت گرد وہاں موجود نہ ہو۔ پاکستانی سکیورٹی فورسز ملک کی سرحدوں کے دفاع اور دہشت گردی کے ناسور کو جڑ سے اکھاڑ پھینکنے کے لیے پرعزم ہیں اور وطن عزیز کے امن کی راہ میں حائل ہر دشمن کو منہ توڑ جواب دیا جائے گا۔ پوری قوم کو اپنی بہادر مسلح افواج کی اس شاندار کامیابی پر فخر ہے جو مادرِ وطن کے دفاع کے لیے ہمہ وقت تیار رہتی ہیں۔