قلات میں سکیورٹی فورسز کا آپریشن، 12 دہشت گرد ہلاک

بلوچستان کے ضلع قلات میں سکیورٹی فورسز نے ایک بڑی اور کامیاب کارروائی کرتے ہوئے 12 دہشت گردوں کو ہلاک کر دیا ہے۔ یہ کارروائی انٹیلی جنس اطلاعات کی بنیاد پر کی گئی جس کا مقصد علاقے میں سرگرم تخریب کاروں کا قلعہ قمع کرنا تھا۔ پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز اور قانون نافذ کرنے والے ادارے صوبے میں پائیدار امن کے قیام کے لیے پرعزم ہیں اور دہشت گردوں کے تمام مذموم عزائم کو خاک میں ملایا جا رہا ہے۔ ذرائع کے مطابق یہ کارروائی اس وقت عمل میں آئی جب سکیورٹی فورسز کو مخصوص علاقوں میں دہشت گردوں کی موجودگی کی خفیہ اطلاع ملی۔ فورسز نے فوری طور پر کارروائی کا آغاز کیا اور انتہائی پیشہ ورانہ مہارت کا مظاہرہ کرتے ہوئے دہشت گردوں کے ٹھکانوں کو گھیرے میں لے لیا۔ شدید فائرنگ کے تبادلے کے بعد 12 دہشت گردوں کو ہلاک کر دیا گیا جبکہ علاقے میں سکیورٹی فورسز کا سرچ آپریشن تاحال جاری ہے تاکہ کسی بھی ممکنہ خطرے کو مکمل طور پر ختم کیا جا سکے۔ واضح رہے کہ حالیہ دنوں میں بلوچستان کے مختلف علاقوں میں سکیورٹی فورسز اور کسٹمز حکام پر بھی بزدلانہ حملے کیے گئے ہیں جن میں چند سکیورٹی اہلکار شہید بھی ہوئے ہیں۔ ان تمام ناخوشگوار واقعات کے جواب میں سکیورٹی فورسز نے صوبے بھر میں کارروائیوں کا دائرہ کار مزید وسیع کر دیا ہے۔ حکام کا کہنا ہے کہ ریاست کی رٹ کو چیلنج کرنے والے عناصر کو کسی صورت معاف نہیں کیا جائے گا اور دہشت گردی کے مکمل خاتمے تک یہ جنگ جاری رہے گی۔ عوام نے بھی سکیورٹی فورسز کی اس بروقت کارروائی کو سراہا ہے اور ملک دشمن عناصر کے خلاف بھرپور حمایت کا یقین دلایا ہے۔