ارینا سبالینکا کا یو ایس اوپن میچ کینابیس کی بو پر رکا

نیویارک میں جاری میگا ٹینس ایونٹ یو ایس اوپن کے دوران ایک عجیب و غریب واقعہ پیش آیا جب عالمی نمبر ایک ٹینس کھلاڑی ارینا سبالینکا کا میچ کینابیس کی تیز بو کے باعث عارضی طور پر روکنا پڑا۔ دنیا کی صف اول کی کھلاڑی ارینا سبالینکا ٹورنامنٹ کے دوران کمیلا راخمووا کے خلاف کورٹ پر مدمقابل تھیں اور انہوں نے شاندار کارکردگی کا مظاہرہ کرتے ہوئے یہ مقابلہ سیدھے سیٹوں میں اپنے نام کیا۔ میچ کے دوران اچانک کورٹ کے اطراف میں کینابیس کی بو محسوس کی گئی جس پر کھلاڑی نے حیرت کا اظہار کیا۔ میچ کے دوران کھیل کچھ دیر کے لیے رک گیا کیونکہ بو اتنی شدید تھی کہ کھلاڑیوں کے لیے توجہ مرکوز رکھنا مشکل ہو رہا تھا۔ ارینا سبالینکا نے امپائر کی توجہ اس غیر معمولی صورتحال کی طرف مبذول کروائی جس کے بعد انتظامیہ نے فوری طور پر اس معاملے کا جائزہ لیا۔ اس سے قبل بھی نیویارک کے یو ایس اوپن کے بعض کورٹس کے اردگرد اس طرح کی شکایات سامنے آ چکی ہیں جہاں شائقین یا قریبی علاقوں سے آنے والی بو میچ کے دوران خلل کا باعث بنتی ہے۔ تاہم اس عارضی تعطل کے باوجود ارینا سبالینکا نے اپنی توجہ کھیل پر مرکوز رکھی اور میچ میں شاندار واپسی کرتے ہوئے حریف کھلاڑی کمیلا راخمووا کو باآسانی شکست دے دی۔ انہوں نے اسٹریٹ سیٹس میں کامیابی حاصل کر کے ٹورنامنٹ کے اگلے مرحلے کے لیے کوالیفائی کر لیا۔ میچ کے بعد میڈیا سے بات چیت کرتے ہوئے کھلاڑیوں نے اس واقعے پر ہلکے پھلکے انداز میں تبصرہ کیا لیکن ساتھ ہی اس بات پر بھی زور دیا کہ بڑے مقابلوں کے دوران اس قسم کے مسائل سے گریز کیا جانا چاہیے۔