مغربی کنਾਰੇ کے کیمپوں کا خالی کرانا جنگی جرم ہے، اقوام متحدہ

جینیوا میں جاری کردہ ایک بیان میں اقوام متحدہ نے خبردار کیا ہے کہ گزشتہ سال اسرائیل کی جانب سے مقبوضہ مغربی کنارے کے تین پناہ گزین کیمپوں سے پوری فلسطینی آبادی کو جبری طور پر بے گھر کرنا انسانیت کے خلاف جرائم کے مترادف ہو سکتا ہے۔ اقوام متحدہ کے انسانی حقوق کے دفتر کے مطابق جنوری 2025 میں مقبوضہ علاقے کے شمال میں شروع کی جانے والی ایک فوجی کارروائی کے دوران 33 ہزار سے زائد افراد کو زبردستی ان کے گھروں سے نکالا گیا۔ آپریشن 'آئرن وال' کے آغاز پر اسرائیلی فوج، پولیس اور دیگر سکیورٹی فورسز نے کیمپوں میں داخل ہو کر شہریوں کو نشانہ بنایا، سیکڑوں مکانات اور بنیادی ڈھانچے کو تباہ کیا اور پانی و بجلی کی سپلاٸی منقطع کر دی۔ رپورٹ میں بتایا گیا ہے کہ انسانی امداد کی رسائی کو روکنے کے بعد گھر گھر جا کر مکینوں کو زبردستی باہر نکالا گیا اور کیمپوں کو اس قابل نہیں چھوڑا گیا کہ وہاں دوبارہ آباد ہو سکے۔ جولائی تک ان تینوں کیمپوں سے بے گھر ہونے والے 33 ہزار 362 فلسطینی پناہ گزینوں کو واپس جانے کی اجازت نہیں دی گئی تھی۔ اقوام متحدہ کے حقوق کے ادارے کا کہنا ہے کہ فضائی حملوں، بکتر بند بلڈوزروں اور دھماکوں کا استعمال کرتے ہوئے پورے کیمپوں کو ناقابلِ رہائش بنانا بین الاقوامی قانون کے تحت قطعی طور پر ناقابلِ قبول ہے۔ اسرائیل کے ان اقدامات سے اجتماعی سزا اور نسلی تطہیر کے سنگین خدشات پیدا ہوتے ہیں۔ دوسری جانب، اسرائیلی کابینہ کے دو وزراء نے غزہ کی پٹی سے فلسطینیوں کے بڑے پیمانے پر انخلا کی تجاویز پیش کی ہیں جنہیں دائیں بازو کے سیاست دانوں کی جانب سے حمایت حاصل ہے۔ وزیرِ دفاع اسرائیل کاٹس اور سکیورٹی وزیر ایتمار بن گویر کی جانب سے ان بیانات کے بعد فلسطینیوں میں اپنے گھروں سے جبری اخراج کا خوف مزید بڑھ گیا ہے۔ حماس نے اس صورتحال پر سخت ردعمل ظاہر کرتے ہوئے عرب اور اسلامی ممالک پر زور دیا ہے کہ وہ فلسطینی عوام کو جبری بے گھر کرنے کی ان خطرناک اسرائیلی سازشوں کے خلاف متحد ہو کر موثر اقدامات کریں اور ان مذموم عزائم کو ناکام بنائیں۔