امریکہ کا سعودی عرب کے لیے 5 ارب ڈالر کے ہتھیاروں کی منظوری کا اعلان

واشنگٹن: امریکہ نے مشرق وسطیٰ میں ایران کے ساتھ بڑھتی ہوئی کشیدگی اور جنگی صورتحال کے پیش نظر سعودی عرب کے لیے تقریباً 5 ارب ڈالر مالیت کے بموں اور دفاعی سازوسامان کی فروخت کی منظوری دیدی ہے۔ امریکی وزارت خارجہ اور متعلقہ دفاعی اداروں کی جانب سے اس ممکنہ ڈیل کو ہری جھنڈی دکھا دی گئی ہے جس کا مقصد خطے میں اپنے اہم اتحادی کی دفاعی صلاحیتوں کو مزید مستحکم کرنا ہے۔ بین الاقوامی خبر رساں اداروں کے مطابق اس مجوزہ معاہدے میں بنیادی طور پر جوائنٹ ڈائریکٹ اٹیک میونیشنز-ایسٹینڈ رینج (JDAM-ER) اور ان سے متعلقہ گائیڈنس کٹس کی فراہمی شامل ہے۔ یہ جدید ٹیکنالوجی سعودی مسلح افواج کو فضائی دفاعی امور میں مزید خود کفیل بنانے اور درستگی کے ساتھ اہداف کو نشانہ بنانے کی صلاحیت فراہم کرے گی۔ حالیہ ہفتوں میں خطے کے اندر ایران اور اس کے اتحادیوں کے ساتھ جاری کشیدگی کے تناظر میں یہ عسکری معاہدہ انتہائی اہمیت کا حامل سمجھا جا رہا ہے۔ امریکی حکام کا کہنا ہے کہ اس فروخت کا مقصد سعودی عرب کی قومی سلامتی کو درپیش چیلنجز سے نمٹنے میں مدد دینا اور خطے میں امن و استحکام کا فروغ ہے۔ اس فیصلے سے جہاں ایک طرف واشنگٹن اور ریاض کے دیرینہ اسٹریٹجک تعلقات کو مزید تقویت ملے گی، وہیں دوسری طرف مشرق وسطیٰ کے بدلتے ہوئے جیو پولیٹیکل منظر نامے میں اس کے گہرے اثرات مرتب ہونے کی توقع کی جا رہی ہے۔