امریکی سفیر کا بیان: مغربی کنارے میں فلسطینیوں کے تحفظ کی ذمہ داری اسرائیل پر ہے

امریکہ کے سفیر نے ہفتے کے روز کہا کہ اسرائیلی حکومت کی یہ بنیادی ذمہ داری بنتی ہے کہ وہ مقبوضہ مغربی کنارے میں رہنے والے فلسطینیوں کی حفاظت کو یقینی بنائے۔ یہ بیان ایک ایسے وقت میں سامنے آیا ہے جب خطے میں یہودی آباد کاروں کے حملوں میں تشویشناک حد تک اضافہ دیکھا گیا ہے۔ امریکی سفیر مائیک ہکا بی نے مقبوضہ مغربی کنارے میں فلسطینی نژاد امریکی شہریوں سے ملاقات کے بعد میڈیا سے گفتگو کرتے ہوئے کہا کہ ان کی طرف سے مسلسل یہ پیغام دیا جا رہا ہے کہ ان کمیونٹیز کے لوگوں کو بھی ایک خاص سطح کا تحفظ اور سلامتی کے ساتھ جینے کا حق حاصل ہے اور حکومت کی ذمہ داری ہے کہ وہ اس بات کو عملی طور پر ممکن بنائے۔ سفیر مائیک ہکا بی نے غزہ کے حوالے سے بھی گفتگو کی اور بتایا کہ جنگ زدہ علاقے کے تقریباً بیس لاکھ افراد کو زبردستی ان کے گھروں سے بے دخل کرنے کا کوئی ارادہ نہیں ہے۔ انہوں نے دو ٹوک الفاظ میں واضح کیا کہ اسرائیل کا ایسا کوئی بھی منصوبہ زیر غور نہیں ہے جس کے تحت لوگوں کو ان کی مرضی کے خلاف غزہ سے نکالا جائے۔ اس دورے کے دوران امریکی سفیر نے ترمس عیا نامی قصبے کا دورہ کیا جو رام اللہ کے قریب واقع ہے اور جہاں حالیہ دنوں میں یہودی آباد کاروں کی جانب سے بارہا حملے کیے گئے ہیں۔ اس قصبے کے لگ بھگ اسی فیصد رہائشی امریکی شہریت کے حامل ہیں۔ قصبے کے میئر اور دیگر مقامی مکینوں نے امریکی سفیر کے سامنے اپنے تحفظات کا اظہار کیا اور مطالبہ کیا کہ قانون کو ہاتھ میں لینے والے ان مششتعل عناصر کے خلاف سخت کارروائی عمل میں لائی جائے۔ مکینوں کا کہنا تھا کہ آباد کاروں کی طرف سے ہراساں کیے جانے کے واقعات روز کا معمول بن چکے ہیں جنہیں روکنے میں مقامی انتظامیہ بے بس دکھائی دیتی ہے۔ مائیک ہکا بی نے اس موقع پر اپنے خیالات کا اظہار کرتے ہوئے کہا کہ وہ پرتشدد کارروائیاں کرنے والے آباد کاروں کے احتساب کے حامی ہیں، تاہم ان کا یہ بھی ماننا ہے کہ یہ عناصر مجموعی آبادی کا ایک چھوٹا سا حصہ ہیں۔ یاد رہے کہ سن دو ہزار بائیس کے آخر میں وزیر اعظم بنجمن نیتن یاہو کی انتہائی دائیں بازو کی حکومت اقتدار میں آنے کے بعد سے مغربی کنارے میں آباد کاروں کے پرتشدد واقعات میں نمایاں تیزی آئی ہے، جس پر عالمی سطح پر گہری تشویش کا اظہار کیا جا رہا ہے۔