پاکستان نیوی ڈے اسلام آباد نیول ہیڈ کوارٹرز میں منایا گیا

اسلام آباد میں نیول ہیڈ کوارٹرز کے اندر پاکستان نیوی ڈے انتہائی ملی جوش و جذبے اور شایان شان طریقے سے منایا گیا۔ اس پروقار موقع پر ملک بھر میں پاک بحریہ کے بہادر سپوتوں اور شہداء کو زبردست خراج تحسین پیش کیا گیا جنہوں نے مادرِ وطن کے دفاع کے لیے اپنی جانوں کے نذرانے پیش کیے۔ صدرِ پاکستان اور وزیراعظم نے اپنے خصوصی پیغامات میں پاک بحریہ کے افسران اور جوانوں کی پیشہ ورانہ صلاحیتوں کو سراہا اور جنگ ستمبر کے شہداء کی قربانیوں کو یاد کیا۔ تقریب کے دوران دفاعی تیاریوں اور سمندری حدود کے تحفظ کے عزم کا اعادہ کیا گیا۔اس موقع پر اپنے خیالات کا اظہار کرتے ہوئے پاک بحریہ کے سربراہ ایڈمرل نوید اشرف نے کہا کہ پاکستان نیوی کی حقیقی طاقت کسی بھی بیرونی خطرے کے سامنے اس کا غیر متزلزل عزم، بے پناہ قربانیاں اور شجاعت ہے۔ انہوں نے اس بات پر زور دیا کہ پاک بحریہ ملکی سمندری سرحدوں کی حفاظت کے لیے ہم وقت تیار ہے اور دشمن کے ہر ناپاک عزم کو خاک میں ملانے کی صلاحیت رکھتی ہے۔ انہوں نے اس عزم کا بھی اظہار کیا کہ نیوی کے جوان ملک کی سمندری معیشت اور توانائی کے اہم ذخائر کے تحفظ کے لیے اپنی ذمہ داریاں بھرپور احسن طریقے سے نبھا رہے ہیں۔دوسری جانب ذرائع ابلاغ کی رپورٹس کے مطابق پاکستان بحریہ خطے میں امن کے قیام اور میری ٹائم سیکیورٹی کے فروغ کے لیے بھی اہم کردار ادا کر رہی ہے۔ حالیہ کشیدہ عالمی حالات بالخصوص مشرق وسطیٰ کے تنازع کے تناظر میں پاکستانی نیوی نے اپنی تمام تر توانائیوں کو بروئے کار لاتے ہوئے توانائی کی لائف لائنز اور تجارتی راستوں کو مکمل تحفظ فراہم کیا ہے۔ حکومت اور عسکری قیادت نے اس بات کا اعادہ کیا ہے کہ پاکستان ایک پرامن ملک ہے لیکن اپنی سمندری حدود اور سالمیت پر کسی قسم کا سمجھوتہ نہیں کیا جائے گا۔ نیوی ڈے کی تقریبات نے ایک بار پھر پوری قوم کو یہ یقین دلایا ہے کہ سمندروں میں پاکستان کا دفاع مکمل طور پر مضبوط اور محفوظ ہاتھوں میں ہے۔