فیفا پر خواتین فٹبال کیلنڈر سے متعلق جارحانہ رویے کا الزام

فٹبال کی عالمی تنظیم فیفا کو ایک بار پھر سخت قانونی اور انتظامی دباؤ کا سامنا کرنا پڑ رہا ہے۔ تازہ ترین پیش رفت کے مطابق یورپی لیگز نے خواتین کے فٹبال کیلنڈر کے معاملے پر فیفا پر جارحانہ رویے کا سنگین الزام عائد کیا ہے۔ اس سلسلے میں باضابطہ طور پر یورپی کمیشن سے رجوع کیا گیا ہے تاکہ کلب فٹبال اور بین الاقوامی مقابلوں کے درمیان توازن قائم کیا جا سکے اور کھلاڑیوں کے حقوق کا تحفظ ممکن بنایا جا سکے۔ یورپی لیگز کی جانب سے دائر کی جانے والی اس نئی شکایت کا بنیادی مقصد خواتین کے فٹبال میچوں کے شیڈول میں موجود مبینہ بے ضابطگیوں اور کلبوں کے اختیارات پر پڑنے والے منفی اثرات کو اجاگر کرنا ہے۔ تنظیم کا مؤقف ہے کہ فیفا کی جانب سے یکطرفہ طور پر کیلنڈر طے کیے جانے کی وجہ سے نہ صرف کھلاڑیوں پر ورک لوڈ بڑھ رہا ہے بلکہ علاقائی لیگز کا تسلسل بھی متاثر ہو رہا ہے۔ واضح رہے کہ یورپی لیگز باڈی نے اس سے قبل اکتوبر 2024 میں بھی مردوں کے فٹبال کیلنڈر اور کھلاڑیوں کے تحفظ کے حوالے سے یورپی کمیشن میں ایک باضابطہ شکایت درج کروائی تھی۔ اب خواتین کے کیلنڈر کو بھی اس دائرہ کار میں شامل کرنے سے یہ تنازع مزید شدت اختیار کر گیا ہے، جس پر فٹبال کے عالمی حلقوں کی گہری نظریں لگی ہوئی ہیں۔ ماہرین کا کہنا ہے کہ اگر یورپی کمیشن اس معاملے میں مداخلت کرتا ہے تو اس کے نتیجے میں عالمی فٹبال کے شیڈول میں انقلابی تبدیلیاں آ سکتی ہیں۔ فیفا کی جانب سے تحال اس شکایت پر کوئی حتمی ردعمل سامنے نہیں آیا ہے، تاہم آنے والے دنوں میں اس قانونی چارہ جوئی کے کھیل پر گہرے اثرات مرتب ہو سکتے ہیں۔