ملک اقبال چنڑ انتقال کر گئے - ن لیگ کے سینئر رہنما کی وفات پر سوگ

لاہور: پاکستان مسلم لیگ ن کے رکن قومی اسمبلی اور جنوبی پنجاب کے بااثر سیاستدان ملک محمد اقبال چنڑ 76 برس کی عمر میں انتقال کر گئے۔ مرحوم پچھلے کئی ہفتوں سے علیل تھے اور ہفتے کے روز بہاولپور میں دارِ فانی سے کوچ کر گئے۔ خاندانی ذرائع کے مطابق ان کی نمازِ جنازہ ہفتے کی شام چھ بجے بہاولپور اسٹیڈیم میں ادا کی جائے گی۔ مرحوم پنجاب اسمبلی کے ڈپٹی اسپیکر ملک ظہیر اقبال چنڑ کے والد تھے۔ ملک اقبال چنڑ نے ماضی میں صوبائی وزیر کے طور پر بھی فرائض سر انجام دیے اور وہ حلقہ این اے 168 بہاولپور سے قومی اسمبلی کے رکن منتخب ہوئے تھے۔ وہ جنوبی پنجاب میں مسلم لیگ ن کے ایک نظریاتی اور متحرک رہنما مانے جاتے تھے جنہوں نے دہائیوں تک عوامی خدمت کی سیاست کی۔ وزیراعظم شہباز شریف نے ملک محمد اقبال چنڑ کے انتقال پر گہرے رنج و غم کا اظہار کیا ہے اور ان کی سیاسی، سماجی اور عوامی خدمات کو شاندار الفاظ میں خراجِ تحسین پیش کیا ہے۔ وزیراعظم نے انہیں ایک مخلص عوامی نمائندہ، مسلم لیگ ن کا پرعزم کارکن اور سابق وزیراعظم نواز شریف کا پرانا اور وفادار ساتھی قرار دیا۔ انہوں نے کہا کہ انہیں ذاتی طور پر ملک اقبال کے ساتھ کام کرنے کا موقع ملا اور ان کی خدمات کو ہمیشہ یاد رکھا جائے گا۔ مسلم لیگ ن کے صدر اور سابق وزیراعظم محمد نواز شریف نے بھی اپنے پیغام میں گہرے دکھ کا اظہار کرتے ہوئے کہا کہ وہ ایک سچے عوامی نمائندہ تھے جنہوں نے ہمیشہ خدمتِ خلق کو اپنا شعار بنایا۔ پنجاب کی وزیراعلیٰ مریم نواز اور قومی اسمبلی کے اسپیکر سردار ایاز صادق نے بھی سوگوار خاندان سے تعزیت کا اظہار کرتے ہوئے کہا کہ پارلیمنٹ ایک مخلص اور باوقار رکن سے محروم ہو گئی ہے۔