سندھ کے سرکاری اسکولوں اور کالجوں کے اوقات کار میں کمی

سندھ حکومت نے بدھ کے روز ایک اہم فیصلے کے تحت صوبے بھر کے تمام سرکاری اسکولوں اور کالجوں کے اوقات کار میں فوری طور پر ایک گھنٹے کی کمی کا اعلان کیا ہے۔ محکمہ اسکول ایجوکیشن اینڈ لٹریسی ڈیپارٹمنٹ کی جانب سے جاری کردہ ایک باضابطہ سرکولر میں واضح کیا گیا ہے کہ پہلے سے طے شدہ پانچ روزہ تعلیمی ہفتے کے دوران اسکولوں کے اوقات میں ایک گھنٹے کی کمی کی جائے گی۔ حکام کا کہنا ہے کہ اس دوران پرانے سرکولر میں درج دیگر تمام شرائط، ضوابط اور ہدایات بدستور برقرار رہیں گی اور ان پر عمل درآمد جاری رہے گا۔ تمام متعلقہ تعلیمی اداروں کے سربراہان اور فیلڈ افسران کو ہدایت کی گئی ہے کہ وہ نئے اوقات کار پر اس کی اصل روح کے مطابق سختی سے عمل درآمد کو یقینی بنائیں۔ نئے احکامات کے مطابق سنگل شفٹ اور ڈبل شفٹ چلانے والے پرائمری، سیکنڈری اور ہائر سیکنڈری اسکولوں کے لیے مختلف اوقات مقرر کیے گئے ہیں جو سال کے مختلف حصوں مثلاً 31 اکتوبر تک اور یکم نومبر سے 31 مارچ تک کے لیے تقسیم کیے گئے ہیں۔ ان تبدیلیوں کا مقصد تعلیمی نظام میں بہتری لانا اور طلبا و اساتذہ کو سہولت فراہم کرنا ہے۔ محکمہ اسکول ایجوکیشن کی جانب سے جاری کردہ تفصیلی شیڈول میں پیر سے جمعرات اور جمعہ کے روز کے لیے الگ الگ اوقات کار طے کیے گئے ہیں تاکہ تعلیمی سرگرمیاں بلا تعطل اور احسن طریقے سے جاری رکھی جا سکیں۔ دوسری جانب محکمہ کالج ایجوکیشن کی طرف سے جاری کردہ ایک الگ نوٹیفکیشن میں بھی کالجوں کے اوقات میں فوری طور پر ایک گھنٹے کی کمی کا اعلان کیا گیا ہے۔ کالجوں کی مارننگ شفٹ کے لیے نئے اوقات کار پیر سے جمعرات تک صبح ساڑے آٹھ بجے سے دوپہر ڈیڑھ بجے تک ہوں گے جبکہ جمعہ کے روز صبح ساڑھے آٹھ بجے سے ساڑھے گیارہ بجے تک کلاسز ہوں گی۔ شام کی شفٹ کے لیے کالج پیر سے جمعرات تک دوپہر تین بجے سے شام سات بجے تک اور جمعہ کے روز دوپہر ڈھائی بجے سے شام پانچ بجے تک کھلے رہیں گے۔ یاد رہے کہ اس سے قبل رواں سال کے دوران سندھ حکومت کی جانب سے تعلیمی اداروں کے ہفتہ وار ایام اور اوقات کار میں وقتاً فوقتاً تبدیلیاں کی جاتی رہی ہیں۔ جولائی کے آخر میں صوبائی حکومت نے تمام سرکاری اور نجی تعلیمی اداروں کے لیے چھ روزہ ہفتے کا اعلان کیا تھا تاہم اگلے ہی روز نجی اسکولوں کو اپنی سہولت کے مطابق شیڈول طے کرنے کی اجازت دے دی گئی تھی۔ اگست کے اوائل میں حکومت نے پچھلا فیصلہ واپس لیتے ہوئے اسکولوں اور کالجوں کے لیے پانچ روزہ ہفتہ بحال کر دیا تھا اور اب تازہ ترین اقدام کے تحت تعلیمی اداروں کے روزانہ کے اوقات کار میں ایک گھنٹے کی کمی کر دی گئی ہے۔