عمان کے قریب آئل ٹینکر پر نامعلوم شے کا حملہ، برطانوی ادارہ متحرک

برطانیہ کے میری ٹائم ٹریڈ آپریشنز (UKMTO) نے ایک بیان میں انکشاف کیا ہے کہ سلطنت عمان کے ساحل کے قریب ایک کمرشل آئل ٹینکر کو نامعلوم پروجیکٹائل یعنی شے سے نشانہ بنایا گیا ہے۔ یہ واقعہ سمندر میں میری ٹائم سیکیورٹی کے حوالے سے ایک بار پھر تشویش کی لہر دوڑا گیا ہے کیونکہ خلیجی ممالک کے ساحلی علاقوں میں اس طرح کے واقعات جہاز رانی اور توانائی کی سپلائی لائنز کو متاثر کرتے ہیں۔ برطانوی ادارے کا کہنا ہے کہ وہ واقعے کی مکمل اور باریک بینی سے تحقیقات کر رہے ہیں تاکہ یہ معلوم کیا جا سکے کہ حملہ کس سمت سے کیا گیا اور اس کے پیچھے کون سے عناصر ملوث ہو سکتے ہیں۔ابتدائی اطلاعات کے مطابق نامعلوم پروجیکٹائل کے ٹکرانے سے جہاز کے ڈھانچے کو کچھ نقصان پہنچا ہے تاہم عملے کے تمام ارکان کے محفوظ ہونے کی تصدیق کی گئی ہے۔ جہاز کے کپتان اور متعلقہ حکام نے فوری طور پر میری ٹائم سیکیورٹی ایجنسیوں کو الرٹ جاری کیا تھا جس کے بعد امدادی کارروائیاں شروع کر دی گئیں اور جہاز کو مزید حفاظتی اقدامات فراہم کیے جا رہے ہیں۔ خلیجی خطے اور بحیرہ عرب میں اس نوعیت کے سیکیورٹی خدشات پہلے بھی سامنے آتے رہے ہیں جو بین الاقوامی تجارت کے لیے ایک بڑا چیلنج بن چکے ہیں۔عالمی شپنگ انڈسٹری سے وابستہ ماہرین کا کہنا ہے کہ اس حملے کے بعد بحیرہ عرب اور آبنائے ہرمز کے ارد گرد سیکیورٹی کے انتظامات مزید سخت کیے جانے کی ضرورت ہے۔ اس واقعے سے ایک بار پھر یہ ثابت ہوتا ہے کہ سمندری گزرگاہیں غیر مستحکم حالات کی وجہ سے کتنی حساس ہیں اور کسی بھی ناگہانی صورتحال سے نمٹنے کے لیے علاقائی و بین الاقوامی تعاون کتنا ضروری ہے۔ متعلقہ حکام صورتحال پر کڑی نظر رکھے ہوئے ہیں اور آئل ٹینکر کو محفوظ مقام پر منتقل کرنے کے لیے تمام ضروری تکنیکی اقدامات عمل میں لائے جا رہے ہیں۔