پشاور میں سی ٹی ڈی آپریشن، اسلام آباد امام بارگاہ حملے کا ماسٹر مائنڈ ہلاک

پشاور میں انسداد دہشت گردی کے محکمے (سی ٹی ڈی) اور سکیورٹی فورسز نے ایک اہم اور کامیاب انٹیلی جنس بیسڈ آپریشن کے دوران کالعدم تنظیم داعش (ISKP) کے پانچ خطرناک دہشت گردوں کو جہنم واصل کر دیا۔ مارے جانے والے دہشت گردوں میں اسلام آباد امام بارگاہ حملے کا مرکزی ماسٹر مائنڈ بھی شامل ہے، جو طویل عرصے سے قانون نافذ کرنے والے اداروں کو مطلوب تھا۔ سکیورٹی ذرائع کے مطابق یہ کارروائی مصدقہ اطلاعات کی بنیاد پر عمل میں لائی گئی، جس کا مقصد علاقے میں کسی بھی بڑے دہشت گردانہ واقعے کو ناکام بنانا تھا۔ آپریشن کے دوران دہشت گردوں اور سکیورٹی فورسز کے درمیان شدید فائرنگ کا تبادلہ ہوا، جس میں یہ تمام خوارج ہلاک ہو گئے۔ ہلاک ہونے والا دہشت گرد کمانڈر نہ صرف اسلام آباد امام بارگاہ حملے میں ملوث تھا بلکہ وہ دیگر کئی ٹارگٹ کلنگز، بھتہ خوری اور ریاست مخالف سرگرمیوں میں بھی سرگرم رہا تھا۔ اس کے علاوہ وہ معروف شخصیت مولانا خان زیب اور دیگر بے گناہ شہریوں کے قتل کے مقدمات میں بھی انتہائی مطلوب تھا۔ سی ٹی ڈی حکام کے مطابق موقع سے بڑی مقدار میں خودکش جیکٹس، جدید اسلحہ، گولہ بارود اور تخریبی مواد بھی برآمد کیا گیا ہے، جسے بروقت کارروائی سے ناکام بنا دیا گیا۔ صوبائی دارالحکومت پشاور اور گردونواح میں سکیورٹی فورسز کی جانب سے سرچ آپریشن کا دائرہ کار مزید وسعت دے دیا گیا ہے تاکہ اس نیٹ ورک کے باقی ماندہ کارندوں کو بھی جلد قانون کی گرفت میں لایا جا سکے۔ اس کامیاب آپریشن پر حکومت اور عسکری قیادت نے سکیورٹی فورسز اور سی ٹی ڈی کے اہلکاروں کی پیشہ ورانہ صلاحیتوں کو سراہا ہے اور عزم ظاہر کیا ہے کہ ملک سے دہشت گردی کے ناسور کو جڑ سے اکھاڑ پھینکنے تک بلا تفریق کارروائیاں جاری رہیں گی۔