گلگت بلتستان: امام ملک کی رکنیت معطل، پوسٹل بیلٹس کی گنتی کا حکم

گلگت بلتستان الیکشن ٹریبونل نے جمعہ کے روز استحکام پاکستان پارٹی (آئی پی پی) کے رہنما اور حلقہ جی بی اے 16 دیامر ٹو سے گلگت بلتستان اسمبلی کے رکن امام ملک کی رکنیت معطل کر دی ہے۔ عدالت نے متعلقہ ریٹرننگ افسر کو ہدایت کی ہے کہ وہ اس حلقے کے تمام پوسٹل بیلٹ پیپرز کی تصدیق اور گنتی کا عمل 16 ستمبر تک لازمی مکمل کریں۔ الیکشن ٹریبونل کے جج مشتاق احمد نے پیپلز پارٹی کے امیدوار عطا اللہ خان کی جانب سے دائر کردہ درخواست پر سماعت کے بعد یہ فیصلہ صادر کیا۔ عطا اللہ خان نے اپنے وکیل کے توسط سے جی بی اے 16 دیامر ٹو کے عام انتخابات کے نتائج کو عدالت میں چیلنج کیا تھا، جس میں مؤقف اختیار کیا گیا تھا کہ ریٹرننگ افسر نے پوسٹل بیلٹس کو شمار کیے بغیر ہی فارم 49 جاری کر دیا تھا۔ واضح رہے کہ انتخابات کے بعد گلگت بلتستان کے چیف الیکشن کمشنر نے اس وقت کے آزاد امیدوار امام ملک کو فاتح قرار دیا تھا، جنہوں نے بعد میں آئی پی پی میں شمولیت اختیار کر لی تھی۔ درخواست گزار نے ٹریبونل سے استدع کی تھی کہ حلقے کے متنازع نتیجے کو کالعدم قرار دیا جائے اور کامیاب امیدوار کا نوٹیفکیشن منسوخ کر کے پوسٹل بیلٹس کی گنتی کے بعد نیا نتیجہ جاری کیا جائے۔ دونوں فریقین کے دلائل سننے کے بعد ٹریبونل کے جج مشتاق احمد نے فیصلہ سناتے ہوئے قرار دیا کہ ریٹرننگ افسر کو یہ اختیار حاصل نہیں تھا کہ وہ پوسٹل بیلٹس کے بغیر عارضی نتیجہ جاری کرتا۔ عدالتی فیصلے کے مطابق چیف الیکشن کمشنر نے بھی اس عارضی نتیجے کی بنیاد پر اعلامیہ جاری کرنے میں سنگین غلطی کی ہے۔ ٹریبونل نے اپنے حکم نامے میں کہا ہے کہ الیکشن ایکٹ 2017 کے سیکشن 95 اور الیکشن رولز 2017 کے رول 85 کی لازمی قانونی شروط کو پورا کرنے کے لیے یہ حکم نامہ جاری کیا گیا ہے تاکہ شفافیت کو یقینی بنایا جا سکے۔ عدالت نے حکم دیا ہے کہ ریٹرننگ افسر فریقین یا ان کے مجاز نمائندوں کی موجودگی میں پوسٹل بیلٹ پیپرز کے سیل شدہ پارسل کو کھولے۔ اس عمل میں شفافیت برقرار رکھنے کے لیے سینئر جج اور اسسٹنٹ رجسٹرار پر مشتمل عدالتی ٹیم بھی جائے وقوعہ پر موجود رہے گی۔ علاوہ ازیں، پولیس کو سخت سیکیورٹی انتظامات کرنے کی بھی ہدایت کی گئی ہے۔ پوسٹل بیلٹس کی تصدیق اور گنتی مکمل ہونے کے بعد ریٹرننگ افسر نیا فارم 49 تیار کر کے چیف الیکشن کمشنر کو ارسال کرے گا، جس کی روشنی میں کامیابی کا نیا نوٹیفکیشن جاری ہوگا۔ عدالت نے واضح کیا ہے کہ اس تمام عمل کو مقررہ مدت کے اندر مکمل کیا جائے جبکہ اس دوران امام ملک کی رکنیت معطل رہے گی۔