سینڈرا بلاک کا ہالی ووڈ آڈیشینز میں ہراسانی پر بڑا انکشاف

ہالی ووڈ کی آسکر ایوارڈ یافتہ مشہور اداکارہ سینڈرا بلاک نے حال ہی میں اپنے فلمی کیرئیر کے ابتدائی دنوں کو یاد کرتے ہوئے انکشاف کیا ہے کہ انہیں اپنے ابتدائی آڈیشینز کے دوران انتہائی شرمناک اور ناخوشگوار صورتحال کا سامنا کرنا پڑا تھا۔ اداکارہ کے مطابق اس دور میں فلمی صنعت کے اندر بعض افراد کا رویہ انتہائی غیر پیشہ ورانہ اور توہین آمیز ہوتا تھا، جو نوجوان فنکاروں کی مجبوری کا ناجائز فائدہ اٹھانے کی کوشش کرتے تھے۔ سینڈرا بلاک نے ایک انٹرویو کے دوران انکشاف کیا کہ کچھ پروڈیوسرز اور ڈائریکٹرز نے ان سے آڈیشین کے دوران اس طرح کے مطالبات کیے جو کسی بھی طرح قابلِ قبول نہیں تھے۔ انہوں نے بتایا کہ ایک موقع پر انہیں انتہائی نامناسب انداز میں دباؤ کا سامنا کرنا پڑا، جس سے ان کے اندر فلمی دنیا کے اصولوں کے حوالے سے شدید تحفظات پیدا ہوئے تھے۔ ان کا کہنا تھا کہ ایسے افراد فن کی آڑ میں اپنی طاقت کا غلط استعمال کرتے تھے اور نئی آنے والی اداکاراؤں کو ذہنی اذیت میں مبتلا کرتے تھے۔ اداکارہ کا مزید کہنا تھا کہ انہوں نے ان تمام مشکلات کا بڑی دلیری اور استقامت کے ساتھ مقابلہ کیا۔ انہوں نے اس بات پر زور دیا کہ انہوں نے کبھی بھی اپنے اصولوں پر سمجھوتہ نہیں کیا اور اپنی محنت اور صلاحیتوں کے بل بوتے پر ہالی ووڈ میں ایک باوقار مقام حاصل کیا۔ انہوں نے کہا کہ وقت کے ساتھ ساتھ فلمی صنعت کے ماحول میں تبدیلی آئی ہے اور آج خواتین اس طرح کے نامناسب رویوں کے خلاف زیادہ کھل کر آواز اٹھا رہی ہیں۔ سینڈرا بلاک کے اس انکشاف کے بعد ہالی ووڈ کے حلقوں میں ایک بار پھر فلمی صنعت کے اندرونی رویوں پر بحث شروع ہو گئی ہے۔ مداح اور دیگر فنکار سیندرا کی جرأت مندانہ گفتگو کو سراہ رہے ہیں اور ان کا ماننا ہے کہ اس طرح کی آوازیں اٹھانے سے نئے آنے والے فنکاروں خصوصاً خواتین کے لیے کام کا ماحول مزید محفوظ اور بہتر بنایا جا سکتا ہے۔