کراچی میں شدید گرمی اور حبس، درجہ حرارت 40 ڈگری سینٹی گریڈ ریکارڈ

کراچی کے شہریوں کو ستمبر کے مہینے میں بھی شدید گرمی اور حبس کا سامنا ہے کیونکہ شہر کا درجہ حرارت ایک بار پھر چالیس ڈگری سینٹی گریڈ سے تجاوز کر گیا ہے۔ اتوار کے روز صبح سویرے سے ہی سورج کی تپش میں اضافہ دیکھا گیا جس کے باعث شہری گھروں تک محدود ہو کر رہ گئے اور سڑکوں پر معمول کی آمدورفت بھی متاثر ہوئی۔ محکمہ موسمیات کے حکام کے مطابق اس دوران ہوائیں بند رہنے کی وجہ سے حبس کی کیفیت میں مزید اضافہ ہوا ہے جس سے شہریوں کی مشکلات دوچند ہو گئی ہیں۔ دوسری جانب محکمہ موسمیات نے خوشخبری دی ہے کہ خلیج بنگال میں ایک نیا موسمی سسٹم پروان چڑھ رہا ہے جو سندھ کے مختلف علاقوں بالخصوص کراچی میں بارش کا سبب بن سکتا ہے۔ اس سسٹم کے اثرات کے باعث شہر میں بادلوں کے منڈلانے کا سلسلہ شروع ہو چکا ہے اور ماہرین موسمیات کا ماننا ہے کہ آئندہ چند روز کے دوران شہر کے مختلف علاقوں میں ہلکی سے درمیانی بارش ہو سکتی ہے جس سے درجہ حرارت میں نمایاں کمی متوقع ہے۔ محکمہ موسمیات نے ملک کے دیگر حصوں کے حوالے سے بھی پیشگوئی کی ہے کہ پوٹھوہار کے خطے اور خیبر پختونخوا کے مختلف اضلاع میں چودہ سے سترہ ستمبر کے دوران موسلا دھار بارش متوقع ہے۔ ان متوقع بارشوں سے ملک بھر میں جاری گرمی کے زور ٹوٹنے اور موسم خوشگوار ہونے کی اُمید ظاہر کی جا رہی ہے، جبکہ متعلقہ اداروں کو بھی کسی بھی ہنگامی صورتحال سے نمٹنے کے لیے الرٹ کر دیا گیا ہے۔