صدر السیسی اور شہزادہ محمد بن سلمان کی ملاقات، بحیرہ احمر کی صورتحال پر گفتگو

قاہرہ اور ریاض کے درمیان تعلقات کو مزید مستحکم کرنے اور علاقائی سلامتی کے امور پر تبادلہ خیال کے لیے مصری صدر عبدالفتاح السیسی نے سعودی ولی عہد اور وزیراعظم شہزادہ محمد بن سلمان سے اہم ملاقات کی۔ ملاقات کے دوران دونوں رہنماؤں نے دوطرفہ تعلقات کے فروغ اور خطے کی مجموعی صورتحال بالخصوص سلامتی کے مسائل پر تفصیلی گفتگو کی۔ اس موقع پر مصری صدر نے بحیرہ احمر میں بحری نقل و حرکت کو محفوظ بنانے کے لیے سعودی عرب کی طرف سے دی جانے والی کال کی پرزور حمایت کا اعادہ کیا۔ بحیرہ احمر میں جاری سکیورٹی خدشات اور بحران کے باعث نہ صرف خطے کا امن خطرے میں ہے بلکہ بین الاقوامی تجارت کو بھی شدید مشکلات کا سامنا ہے۔ عالمی سپلائی چین متاثر ہونے کے ساتھ ساتھ اس صورتحال کا براہ راست اثر مصر کی معیشت پر پڑ رہا ہے۔ حالیہ بحران کے نتیجے میں مصر کی معیشت کو اربوں ڈالر کا نقصان اٹھانا پڑا ہے، جس کی واضح مثال سویز کینال کی آمدنی میں آنے والی بڑی گراوٹ ہے۔ دستیاب اعداد و شمار کے مطابق گزشتہ دو سالوں کے دوران سویز کینال کی آمدنی میں تقریبا سات ارب ڈالر کی نمایاں کمی ریکارڈ کی گئی ہے جو کہ مصری خزانے کے لیے ایک بڑا دھچکا ہے۔ دونوں رہنماؤں نے اس بات پر اتفاق کیا کہ بین الاقوامی تجارت کے اس اہم گزرگاہ کو محفوظ بنانا اور خطے میں استحکام بحال کرنا تمام متعلقہ فریقین کی مشترکہ ذمہ داری ہے۔ ملاقات میں اس عزم کا بھی اظہار کیا گیا کہ مصر اور سعودی عرب خطے میں امن، سلامتی اور معاشی استحکام کے قیام کے لیے باہمی تعاون کا سلسلہ جاری رکھیں گے تاکہ اس طرح کے چیلنجز سے مؤثر طریقے سے نمٹا جا سکے۔