پرنس ہیری اور میگن مارکل نے سکیورٹی خدشات پر بچوں کا سکول بدل دیا

برطانوی شاہی خاندان کے سابق سینئر ارکان پرنس ہیری اور میگن مارکل کو ایک بار پھر تنقید کا سامنا ہے کیونکہ انہوں نے نئے تعلیمی سال کے آغاز کے محض چند روز بعد ہی اپنے بچوں آرچی اور للی بیٹ کا سکول تبدیل کر دیا ہے۔ ذرائع کے مطابق یہ فیصلہ اس بات کا اعتراف ہے کہ بچوں کے ابتدائی سکول کے انتخاب میں سکیورٹی کے معاملات کو نظر انداز کیا گیا تھا، جسے ماہرین نے خراب منصوبہ بندی قرار دیا ہے۔ غیر ملکی میڈیا کے مطابق جوڑے کو محسوس ہوا کہ سابقہ تعلیمی ادارے میں بچوں کی سکیورٹی کو خطرات لاحق ہو سکتے ہیں، جس کے بعد عجلت میں یہ اہم قدم اٹھایا گیا۔ پرنس ہیری اور میگن مارکل کی طرف سے اٹھائے جانے والے اس قدم پر اب عوامی اور میڈیا حلقوں میں بھی بحث چھڑ گئی ہے۔ ناقدین کا کہنا ہے کہ اس سطح کے مشہور جوڑے کے لیے کسی بھی تعلیمی ادارے کا انتخاب کرنے سے پہلے تمام حفاظتی پہلوؤں کا بغور جائزہ لینا چاہیے تھا۔ اس سے قبل بھی اس جوڑے کی سکیورٹی اور پرائیویسی کے حوالے سے خبریں میڈیا کی زینت بنتی رہی ہیں، تاہم بچوں کی تعلیم کے دوران اس طرح کی تبدیلی نے ایک بار پھر ان کی انتظامی صلاحیتوں پر سوالیہ نشان کھڑے کر دیے ہیں۔ دوسری جانب، شاہی جوڑے کے قریبی ذرائع کا کہنا ہے کہ بچوں کی حفاظت ان کی اولین ترجیح ہے اور وہ اس معاملے پر کسی قسم کا سمجھوتہ کرنے کے لیے تیار نہیں ہیں۔ اسی وجہ سے انہوں نے تمام تنقید کے باوجود فوری طور پر بچوں کو ایک زیادہ محفوظ ماحول میں منتقل کرنے کا فیصلہ کیا ہے۔ توقع کی جا رہی ہے کہ نیا سکول بچوں کو نہ صرف بہتر تعلیمی ماحول فراہم کرے گا بلکہ ان کی نجی زندگی اور سکیورٹی کو بھی یقینی بنائے گا۔