گلگت بلتستان نے مالی سال 2026-27 کا 218 ارب روپے کا بجٹ پیش کر دیا

گلگت بلتستان حکومت نے طویل تاخیر کے بعد منگل کے روز مالی سال 2026-27 کے لیے 218 ارب 84 کروڑ 50 لاکھ روپے کا بجٹ اسمبلی میں پیش کر دیا۔ بجٹ میں 52 ارب روپے سے زائد کا خسارہ ظاہر کیا گیا ہے، جس کو پورا کرنے کے لیے وفاقی حکومت سے اضافی فنڈز کی درخواست کی گئی ہے۔ یاد رہے کہ جولائی میں جی بی حکومت نے پہلی سہ ماہی کے لیے 20 ارب 47 کروڑ روپے کا عبوری بجٹ پیش کیا تھا اور یہ اعلان کیا تھا کہ مکمل سالانہ بجٹ تین ماہ بعد لایا جائے گا۔ اسمبلی کے اجلاس میں بجٹ پیش کرتے ہوئے سینئر وزیر محمد علی اختر نے جو کہ وزارت خزانہ کا قلمدان بھی رکھتے ہیں، ایوان کو بتایا کہ ان کی منتخب حکومت نے جون کے آخر میں ذمہ داریاں سنبھالی تھیں۔ انہوں نے کہا کہ نئے مالی سال کے آغاز اور حکومت کی تشکیل کے درمیان وقت بہت کم تھا، اس لیے حکومت نے معاملات کی بہت بہتری اور ضروری اخراجات کی بروقت فراہمی کو یقینی بنانے کے لیے عبوری بجٹ پیش کیا۔ سینئر وزیر نے اپنے خطاب میں واضح کیا کہ حکومت نے جلد بازی میں محض اعداد و شمار کا مجموعہ پیش کرنے کے بجائے عوام کی حقیقی ضروریات، ترجیحات اور امنگوں کی عکاسی کرنے والے بجٹ کو ترجیح دی۔ نئے بجٹ میں تعلیم، صحت، بنیادی ڈھانچے اور معاشرے کے محروم طبقات کی فلاح و بہبود پر خصوصی توجہ مرکوز کی گئی ہے۔ کل بجٹ کا حجم تقریباً 218.84 ارب روپے تخمینہ لگایا گیا ہے، جس میں سے 43.97 ارب روپے ترقیاتی اور 149.87 ارب روپے غیر ترقیاتی اخراجات کے لیے مختص کیے گئے ہیں۔ وفاقی حکومت کے استحکام پیکیج کو شامل کرنے کے بعد جی بی کے اس بجٹ کا حجم اس سطح پر پہنچا ہے۔ وزیر خزانہ نے مزید بتایا کہ ٹیکس ریونیو کا ہدف 16.98 ارب روپے مقرر کیا گیا ہے، جبکہ 52.65 ارب روپے کے بجٹ خسارے کو پورا کرنے کے لیے وفاقی حکومت سے فنڈز کے حصول کی کوششیں جاری ہیں۔ سالانہ ترقیاتی پروگرام کا حجم 22 ارب سے بڑھا کر 23 ارب روپے کر دیا گیا ہے، جبکہ وفاقی پی ایس ڈی پی کے تحت مختص رقم کو 15 ارب سے بڑھا کر 20.97 ارب روپے کر دیا گیا ہے۔ اس کے علاوہ گندم کی سبسڈی کے لیے فنڈ کو 15 ارب سے بڑھا کر 22 ارب روپے کر دیا گیا ہے جبکہ تمام سرکاری و غیر سرکاری اداروں کے ملازمین کی کم از کم اجرت 40 ہزار سے بڑھا کر 44 ہزار روپے مقرر کر دی گئی ہے۔