ایران کا امریکہ پر خطے میں کشیدگی بڑھانے کا الزام، اہم انتباہ

تہران: ایرانی عسکری قیادت نے امریکہ پر سخت تنقید کرتے ہوئے اسے خطے میں جاری کشیدگی اور عدم استحکام کا براہ راست ذمہ دار قرار دیا ہے۔ ایرانی حکام کا کہنا ہے کہ واشنگٹن کی طرف سے اٹھائے جانے والے حالیہ اقدامات اور ممکنہ حملوں کی تیاریاں خطے کے امن کو شدید خطے میں ڈال رہی ہیں۔ اس کشیدہ صورتحال کے تناظر میں ایرانی عسکری حلقوں نے خبردار کیا ہے کہ اگر امریکی بحری ناکہ بندی کا سلسلہ جاری رہا تو آبنائے ہرمز سمیت دیگر اہم بین الاقوامی آبی گزرگاہیں بھی بند کی جا سکتی ہیں، جس کے عالمی معیشت اور تیل کی سپلائی پر گہرے اثرات مرتب ہوں گے۔ دوسری جانب ایرانی جنرلز نے کڑے الفاظ میں تنبیہ کی ہے کہ جو بھی ملک یا طاقت امریکہ کی پشت پناہی کرے گی یا اسے ڈھال فراہم کرے گی، اسے اس جنگ کی آگ کا خمیازہ بھگتنا پڑے گا۔ تجزیہ کاروں کے مطابق، اس بیان کے بعد خطے میں کشیدگی ایک انتہائی خطرناک موڑ پر پہنچ چکی ہے جہاں دونوں ممالک کے درمیان براہ راست محاذ آرائی کا خطرہ بڑھتا جا رہا ہے۔ عالمی برادری بالخصوص خطے کے دیگر ممالک اس تمام صورتحال پر گہری نظر رکھے ہوئے ہیں اور سفارتی سطح پر بحران کو ٹالنے کی کوششیں جاری ہیں، تاہم زمینی حقائق اس بات کی غمازی کرتے ہیں کہ دونوں فریقین کے درمیان تناؤ میں فی الحال کمی کے کوئی آثار نظر نہیں آ رہے ہیں۔