جنوبی کوریا کا ایران جنگ میں فوجی مداخلت سے گریز کا اعلان

جنوبی کوریا کے صدر لی جے میونگ نے جمعہ کے روز واضح کیا ہے کہ سیول حکومت ایران کے خلاف جاری جنگ میں فوجی مداخلت کے لیے اپنے دستے یا فوجی اثاثے ہرگز نہیں بھیجے گی۔ انہوں نے میڈیا سے گفتگو کرتے ہوئے دوٹوک الفاظ میں کہا کہ ملک اس جنگ میں کسی بھی قسم کی شمولیت یا مداخلت سے گریز کرے گا اور ہم نے ہمیشہ عدم مداخلت کے اصول کو برقرار رکھا ہے۔ صدر کا یہ بیان ان اطلاعات کے بعد سامنے آیا ہے جن میں کہا جا رہا تھا کہ جنوبی کوریا آبنائے ہرمز میں اسٹریٹجک تعیناتی پر غور کر رہا ہے۔ انہوں نے مزید کہا کہ ملک اپنے تجارتی بحری جہازوں اور تیل کی ترسیل کے راستوں کے تحفظ کے لیے صرف اتنی ہی کم از کم سرگرمیاں انجام دے گا جو انتہائی ضروری ہیں۔ یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ نے دیگر ممالک کی جانب سے ناکافی مدد پر تحفظات کا اظہار کیا تھا اور جنوبی کوریا کا نام بھی لیا تھا، لیکن سیول نے اس معاملے پر صاف انکار کر دیا ہے۔ دوسری جانب صدر لی جے میونگ نے شمالی کوریا اور امریکہ کے درمیان بات چیت کی بحالی کے لیے جاری کوششوں پر بھی روشنی ڈالی۔ انہوں نے کہا کہ یہ بات بالکل واضح ہے کہ امریکی صدر ٹرمپ پیانگ یانگ کے ساتھ بات چیت چاہتے ہیں اور وہ خود بھی فریقین کو مذاکرات کی میز پر لانے کے لیے تکرار کر رہے ہیں۔ شمالی کوریا کی جانب سے حالیہ عرصے میں روس کی حمایت حاصل کرنے کے بعد صورتحال پیچیدہ ضرور ہوئی ہے، لیکن سیول حکام کا ماننا ہے کہ دونوں ملکوں کے درمیان تعطل کو ختم کرنے کے لیے تمام ممکنہ کوششیں جاری رکھی جانی چاہئیں۔ انہوں نے اعتراف کیا کہ یہ سفارتی عمل انتہائی مشکل ضرور ہے لیکن ناممکن نہیں ہے۔ علاوہ ازیں، جنوبی کوریا اور امریکہ کے درمیان تجارت اور معیشت کے شعبے میں جاری سرمایہ کاری کے معاہدوں پر بھی بات چیت پیچیدہ مراحل میں داخل ہو چکی ہے، جہاں امریکی محصولات کے دباؤ سے بچنے کے لیے اربوں ڈالر کی سرمایہ کاری کی شرائط پر مذاکرات جاری ہیں۔ صدر لی نے ملکی داخلی امور پر بات کرتے ہوئے آئینی اصلاحات سے متعلق تنقید کے درمیان اپنی مدتِ صدارت میں توسیع کی کوششوں کو بھی یکسر مسترد کر دیا، جبکہ ریئل اسٹیٹ پالیسیاں اور اسٹاک مارکیٹ میں اتار چڑھاؤ کے باعث ان کی مقبولیت میں حالیہ ہفتوں میں کمی دیکھنے میں آئی ہے۔