بلوچستان میں سیکیورٹی فورسز کی کارروائی، 11 دہشت گرد ہلاک

سیکیورٹی فورسز نے صوبہ بلوچستان کے اضلاع پنجگور اور چاغی میں الگ الگ کارروائیاں کرتے ہوئے مجموعی طور پر 11 دہشت گردوں کو ہلاک کر دیا ہے۔ سرکاری ذرائع کے مطابق یہ کارروائیاں 'آپریشن رد الفتنہ 3' کے تحت عمل میں لائی گئیں۔ پنجگور کے علاقے گووارگو میں سیکیورٹی فورسز نے موثر کارروائی کرتے ہوئے پانچ دہشت گردوں کو موت کے گھاٹ اتار دیا اور ان کے قبضے سے بھاری مقدار میں اسلحہ اور گولہ بارود بھی برآمد کیا گیا۔ اس کارروائی نے علاقے میں امن و امان کی بحالی کے لیے فورسز کے عزم کو مزید واضح کر دیا ہے۔ دوسری جانب، ضلع چاغی کے علاقوں امین آباد اور سیاہ چانگ میں بھی سیکیورٹی فورسز نے کامیاب آپریشن کیے جن کے دوران مزید چھ دہشت گرد ہلاک کیے گئے۔ ان کارروائیوں کے دوران بھی دہشت گردوں کے زیر استعمال ایک نمایاں ذخیرہ برآمد کیا گیا جس میں بھاری اسلحہ اور دھماکہ خیز مواد شامل تھا۔ وفاقی وزیر داخلہ محسن نقوی نے بلوچستان میں دہشت گردوں کے خلاف کامیاب کارروائیوں پر سیکیورٹی فورسز کو زبردست خراج تحسین پیش کیا اور ان کی پیشہ ورانہ صلاحیتوں کو سراہا۔ وزیر داخلہ کا کہنا تھا کہ سیکیورٹی فورسز نے ایک بار پھر اپنی موثر کارروائی کے ذریعے دہشت گردوں کے مذموم عزائم کو خاک میں ملا دیا ہے اور یہ اقدامات قومی سلامتی کے تحفظ کے لیے ان کے پختہ عزم کا منہ بولتا ثبوت ہیں۔ واضح رہے کہ حالیہ ہفتوں کے دوران بلوچستان میں دہشت گردانہ حملوں میں اضافے کا رجحان دیکھا گیا ہے جس کے بعد سیکیورٹی فورسز نے صوبے بھر میں انسداد دہشت گردی کی کارروائیوں کو مزید تیز کر دیا ہے۔ پاکستان انسٹی ٹیوٹ آف کانفلکٹ اینڈ سیکیورٹی اسٹڈیز کے ماہانہ جائزوں کے مطابق، صوبے میں سیکیورٹی خدات کی پیش نظر فورسز نے انٹیلی جنس بیسڈ آپریشنز کا دائرہ کار وسیع کر دیا ہے۔ ماضی میں بھی سیکیورٹی فورسز نے مختلف اضلاع میں کارروائیاں کرکے درجنوں عناصر کو ہلاک کیا ہے جو کہ ملک میں امن دشمن عناصر کے خاتمے کے لیے حکومتی عزم کو ظاہر کرتا ہے۔ ماہرین کا ماننا ہے کہ ملک دشمن عناصر کے خلاف جاری یہ کارروائیاں صوبے میں دیرپا امن اور استحکام کی ضمانت ہیں۔ عامتہ الناس نے بھی سیکیورٹی فورسز کی ان کارروائیوں کو سراہا ہے اور اس عزم کا اظہار کیا ہے کہ ملک سے دہشت گردی کے ناسور کو جڑ سے اکھاڑ پھینکنے کے لیے پوری قوم اپنی فورسز کے شانہ بشانہ کھڑی ہے۔ سیکیورٹی اداروں کی جانب سے اس بات کا اعادہ کیا گیا ہے کہ ملک کے کونے کونے سے دہشت گردی کے خاتمے تک یہ آپریشنز بلا تعطل جاری رہیں گے۔