قطر کا خلیجی خطے اور ایران کے لیے نئے سکیورٹی فریم ورک پر زور

قطر کے وزیراعظم نے خطے کے بدلتے ہوئے حالات اور سکیورٹی خدکات کے پیش نظر ایک اہم بیان دیتے ہوئے کہا ہے کہ خلیجی خطے کی سلامتی اس وقت تک یقینی نہیں بنائی جا سکتی جب تک کہ ایک ایسا جامع فریم ورک تیار نہ کیا جائے جو ایران سمیت تمام ہمسایہ ممالک کو شامل کرتا ہو۔ ان کا کہنا تھا کہ خطے کے ممالک کو مل بیٹھ کر ایسے اصول طے کرنا ہوں گے جن کے تحت کوئی بھی ملک دوسرے کے لیے خطرہ نہ بنے۔ ماہرین کے مطابق قطر کا یہ مؤقف خلیجی خطے میں کشیدگی کم کرنے اور سفارتی روابط کو فروغ دینے کی کوششوں کا تسلسل ہے۔ موجودہ عالمی و علاقائی منظر نامے میں خلیجی ممالک اور تہران کے درمیان مذاکرات کی اہمیت پہلے سے کہیں زیادہ بڑھ گئی ہے۔ قطری قیادت کا ماننا ہے کہ خطے میں اقتصادی ترقی اور خوشحالی کے لیے امن ناگزیر ہے اور امن صرف باہمی مکالمے اور مشترکہ سلامتی کے ذریعے ہی حاصل کیا جا سکتا ہے۔ اس مجوزہ فریم ورک کا بنیادی مقصد کسی بھی قسم کی غلط فہمی یا عسکری تصادم کے امکانات کو ختم کرنا ہے۔ خلیجی خطے کے ممالک کو اب یہ احساس ہو چلا ہے کہ عسکری محاذ آرائی کے بجائے سفارت کاری اور تعاون کا راستہ ہی طویل المدتی استحکام کی ضمانت دے سکتا ہے۔ قطر کی جانب سے اس قسم کی تجاویز کا آنا اس بات کا غماز ہے کہ چھوٹا مگر اثر رسوخ رکھنے والا یہ ملک خطے میں ثالثی کا کردار ادا کرنے اور امن کے قیام کے لیے پرعزم ہے۔