عمران خان سے ملاقات: خاندان کے دیگر افراد کا منگل کو اڈیالہ جیل جانے کا فیصلہ

اسلام آباد: قید سابق وزیر اعظم عمران خان کی بہنوں کی حراست کے باوجود خاندان کے دیگر افراد نے منگل کے روز راولپنڈی کی اڈیالہ جیل جانے کا فیصلہ کیا ہے تاکہ ان سے ملاقات کی کوشش کی جا سکے۔ پاکستان تحریک انصاف کے وکیل اویس یونس چوہدری نے بتایا کہ یہ فیصلہ اسلام آباد ہائی کورٹ کو یہ دکھانے کے لیے کیا گیا ہے کہ عدالت کے ہفتہ وار ملاقاتوں کو یقینی بنانے کے احکامات پر عمل درآمد نہیں کیا جا رہا۔ واضح رہے کہ عمران خان 2023 سے قید میں ہیں اور عدالت نے انہیں ہفتے میں دو بار منگل اور جمعرات کو اہل خانہ اور وکلاء سے ملاقات کی اجازت دی تھی۔ سپریم کورٹ کے عبوری حکم کے بعد ایک بہن نورین نیازی کو ملاقات کی اجازت ملی تھی، تاہم اس کے بعد سے ملاقاتیں بند ہیں۔ نورین نیازی کے علاوہ عمران خان کی دیگر دو بہنیں علیمہ خان اور عظمیٰ خان، جو ہر ہفتے جیل جاتی تھیں، انہیں بھی پنجاب ایم پی او کے تحت حراست میں لے لیا گیا ہے۔ پی ٹی آئی کے وکیل نے کہا کہ ہم توقع نہیں کر رہے کہ عدالت کے احکامات پر مکمل عملدرآمد کیا جائے گا، لیکن پھر بھی خاندان کے افراد اور وکلاء اڈیالہ جیل کا رخ کریں گے۔ نام ظاہر نہ کرنے کی شرط پر انہوں نے بتایا کہ سکیورٹی خدشات اور گرفتاری کے خطرے کے پیش نظر ملاقات کے لیے جانے والے افراد کے نام خفیہ رکھے گئے ہیں۔ اس کے علاوہ وکلاء پر مشتمل ایک فہرست بھی جیل انتظامیہ کو جمع کرائی گئی ہے جس میں بیرسٹر گوہر خان اور دیگر رہنما شامل ہیں۔ دوسری جانب تحریک انصاف نے ملک بھر میں 27 ستمبر کے احتجاجی کال سے قبل اپنے اراکین پارلیمنٹ اور رہنماؤں کی مبینہ گرفتاریوں کی شدید مذمت کی ہے۔ پارٹی کا دعویٰ ہے کہ ایم این اے ثناء اللہ مستی خیل، احسن جمال خان اور میان غوث سمیت کئی رہنماؤں کو حراست میں لے لیا گیا ہے۔ پی ٹی آئی نے پارلیمنٹ لاجز سے پارلیمنٹرینز کی گرفتاریوں کو آئین اور جمہوری روایات پر حملہ قرار دیا ہے۔ اپوزیشن اتحاد تحریک تحفظ آئین پاکستان (ٹی ٹی آئی پی) کے رہنماؤں مصطفیٰ نواز کھوکھر اور سینیٹ میں قائد حزب اختلاف علامہ راجہ ناصر عباس نے بھی ملک کی سیاسی صورتحال، سڑکوں کی بندش اور سیاسی کارکنوں کی گرفتاریوں پر شدید تشویش کا اظہار کیا ہے۔