شیخ احمد بن راشد آل مكتوم کا انتقال، دبئی میں سوگ کا اعلان

دبئی کے حکمراں کے بھائی اور امارات کے کھیلوں، کاروبار اور سکیورٹی کے شعبوں میں نمایاں مقام رکھنے والے شیخ احمد بن راشد آل مكتوم 76 برس کی عمر میں انتقال کر گئے ہیں۔ دبئی میڈیا آفس کے حوالے سے خلیج ٹائمز کی رپورٹ کے مطابق ان کا انتقال پیر کے روز ہوا۔ اس افسوسناک واقعے کے بعد دبئی میں پیر سے دس روزہ سرکاری سوگ کا اعلان کیا گیا ہے اور اس دوران امارات بھر میں قومی پرچم سرنگوں رہے گا۔ شیخ احمد بن راشد آل مكتوم مرحوم شیخ راشد بن سعید آل مكتوم کے چوتھے اور سب سے چھوٹے صاحبزادے تھے۔ انہوں نے دبئی پولیس اور پبلک سروسز کے ڈپٹی چیئرمین کی حیثیت سے بھی اہم خدمات انجام دیں اور ملک کی ترقی میں کلیدی کردار ادا کیا۔ ان کے انتقال کی خبر ملتے ہی اماراتی قیادت اور عالمی سطح پر گہرے صدمے کا اظہار کیا گیا۔ دبئی کے حکمراں اور متحدہ عرب امارات کے نائب صدر و وزیراعظم نے سماجی رابطے کی ویب سائٹ پر اپنے بھائی کو خراج عقیدت پیش کرتے ہوئے لکھا کہ آپ ہماری آنکھوں سے اوجھل ہیں لیکن ہماری دعاؤں اور دلوں سے نہیں۔ متحدہ عرب امارات کے صدر شیخ محمد بن زید نے بھی دبئی کے حکمراں سے تعزیت کا اظہار کیا اور ملک کے لیے مرحوم کی طویل خدمات کو سراہا۔ پاکستان کے صدر آصف علی زرداری اور وزیراعظم شہباز شریف نے بھی شیخ احمد بن راشد کے انتقال پر گہرے رنج و غم کا اظہار کیا۔ وزیراعظم آفس سے جاری بیان میں کہا گیا کہ انہوں نے اپنی پوری زندگی عزت اور وقار کے ساتھ دبئی اور متحدہ عرب امارات کی خدمت کے لیے وقف کی۔ پاکستان ان کی قیمتی خدمات کو قدر کی نگاہ سے دیکھتا ہے اور احترام کے ساتھ انہیں خراج عقیدت پیش کرتا ہے۔ نائب وزیراعظم اور وزیر خارجہ اسحاق ڈار سمیت دیگر عالمی شخصیات نے بھی ان کی وفات پر دکھ کا اظہار کرتے ہوئے کہا ہے کہ دبئی کی سلامتی اور ترقی کے لیے ان کی طویل خدمات کو ہمیشہ یاد رکھا جائے گا۔