اسلام آباد اور پاکستان میں زلزلہ، شدت 4.9 ریکارڈ

اسلام آباد، راولپنڈی اور وفاقی دارالحکومت کے گردونواح سمیت پاکستان کے مختلف حصوں میں ریکٹر اسکیل پر 4.9 شدت کے زلزلے کے جھٹکے محسوس کیے گئے ہیں۔ زلزلے کے اس اچانک جھٹکے کے بعد شہریوں میں شدید خوف و ہراس پھیل گیا اور لوگ خوف زدہ ہو کر اپنے گھروں اور دفاتر سے باہر نکل آئے اور کھلے آسمان تلے کلمہ طیبہ کا ورد کرتے رہے۔ ابتدائی اطلاعات کے مطابق زلزلے کے یہ جھٹکے اتنے شدید تھے کہ لوگوں نے بیدار ہو کر فوری طور پر محفوظ مقامات کا رخ کیا۔ دوسری جانب ملک کے دوسرے حصوں بالخصوص صوبہ بلوچستان کے مختلف علاقوں میں بھی زلزلے کے جھٹکے محسوس کیے جانے کی اطلاعات موصول ہوئی ہیں۔ سرکاری ذرائع اور زلززلہ پیما مرکز کے مطابق خضدار اور اس کے گردونواح میں 4.5 شدت کا زلزلہ ریکارڈ کیا گیا ہے۔ اس زلزلے کا مرکز زمین کے اندر مخصوص گہرائی میں تھا جس کی وجہ سے اس کے ارتعاش کو قریبی اضلاع میں بھی محسوس کیا گیا۔ مقامی انتظامیہ اور ریسکیو اداروں نے زلزلے کے بعد صورتحال کا جائزہ لینے کے لیے ہنگامی بنیادوں پر رابطے شروع کر دیے ہیں۔ ابھی تک ملک کے کسی بھی حصے سے زلزلے کے نتیجے میں کسی بڑے جانی نقصان یا مالی نقصان کی کوئی فوری اطلاع موصول نہیں ہوئی ہے۔ تاہم متعلقہ حکام اور ریسکیو ٹیمیں صورتحال پر گہری نظر رکھے ہوئے ہیں اور متاثرہ علاقوں سے مزید تفصیلات اکٹھی کی جا رہی ہیں۔ ماہرین کا کہنا ہے کہ پاکستان زلزلہ خیز پٹی پر واقع ہونے کی وجہ سے اس طرح کے زلززلوں کا شکار رہتا ہے، اس لیے تمام شہریوں کو ہنگامی صورتحال سے نمٹنے کے لیے حفاظتی تدابیر پر عمل کرنے کی ضرورت ہے۔