بلوچستان آپریشن: سکیورٹی فورسز کی کارروائی میں 6 دہشت گرد ہلاک، 23 مغوی بازیاب

بلوچستان میں امن و امان کی صورتحال کو خراب کرنے کی کوشش کرنے والے عناصر کے خلاف سکیورٹی فورسز نے ایک اور بڑا اور کامیاب انٹیلی جنس بیسڈ آپریشن کیا ہے۔ اطلاعات کے مطابق صوبے کے علاقے سرن تنگی اور کلات ہائی وے کے قریب سکیورٹی فورسز نے بروقت کارروائی کرتے ہوئے مجموعی طور پر چھ دہشت گردوں کو ہلاک کر دیا ہے۔ یہ کارروائی اس وقت عمل میں لائی گئی جب دہشت گردوں نے قومی شاہراہ پر بڑی تخریبی کارروائی کی منصوبہ بندی کی تھی اور معصوم شہریوں کو نشانہ بنا رہے تھے۔ سکیورٹی اداروں نے پیشہ ورانہ مہارت کا مظاہرہ کرتے ہوئے نہ صرف دہشت گردوں کے ناپاک عزائم کو خاک میں ملایا بلکہ ان کے قبضے سے 23 مغوی مسافروں کو بھی بحفاظت بازیاب کرا لیا ہے۔ذرائع کے مطابق یہ تمام مغوی کلات ہائی وے کے قریب سے اغوا کیے گئے تھے جنہیں دہشت گرد کسی نامعلوم مقام پر منتقل کرنے کی کوشش کر رہے تھے۔ فورسز کے اچانک اور مؤثر آپریشن کے باعث دہشت گردوں کو سنبھلنے کا موقع نہیں ملا اور فائرنگ کے تبادلے میں 6 دہشت گرد ہلاک ہو گئے۔ اس کے علاوہ پنجگور کے علاقوں میں بھی سکیورٹی فورسز کی جانب سے کارروائیاں جاری ہیں جہاں مزید دہشت گردوں کے مارے جانے کی اطلاعات موصول ہوئی ہیں۔ اس عزم کا اظہار کیا گیا ہے کہ ملک دشمن عناصر کو کسی صورت معاف نہیں کیا جائے گا اور بلوچستان میں پائیدار امن کے قیام تک یہ آپریشنز بلا تعطل جاری رہیں گے۔دریں اثنا، وزیر اعلیٰ بلوچستان نے سکیورٹی فورسز کی اس شاندار کامیابی پر انہیں خراج تحسین پیش کیا ہے۔ انہوں نے کہا کہ بہادر جوانوں نے بروقت کارروائی کر کے ایک بڑے المیے کو ٹال دیا ہے اور 23 مغوی شہریوں کی بحفاظت بازیابی سکیورٹی فورسز کی پیشہ ورانہ صلاحیتوں کا منہ بولتا ثبوت ہے۔ وزیر اعلیٰ نے اس عزم کا اعادہ کیا کہ صوبے میں دہشت گردی کے ناسور کو جڑ سے اکھاڑ پھینکنے کے لیے حکومت اور عوام اپنی فورسز کے شانہ بشانہ کھڑے ہیں۔