پاکستان سنگل ونڈو اور نادرا پاک آئی ڈی ایپ کا انضمام

اسلام آباد (نیوز ڈیسک) پاکستان سنگل ونڈو (پی ایس ڈبلیو) نے نادرا کے ساتھ اشتراک کرتے ہوئے اپنے پلیٹ فارم کو نادرا کی پاک آئی ڈی موبائل ایپ کے ساتھ ضم کرنے کا اعلان کیا ہے۔ اس اہم اقدام کا مقصد صارفین کو سمارٹ فونز کے ذریعے اپنی لازمی بائیو میٹرک تصدیق گھر بیٹھے مکمل کرنے کی سہولت فراہم کرنا ہے۔ اس نئی سہولت کے فعال ہونے کے بعد اب پی ایس ڈبلیو کے صارفین کو اپنی رجسٹریشن، سبسکرپشن کی تجدید اور پروفائل کی اپ ڈیٹس کے لیے نادرا کے ای سہولت مرکز جانے کی ضرورت نہیں رہے گی۔ اس سے پہلے پی ایس ڈبلیو کی خدمات کے حصول کے لیے صارفین کے لیے نادرا کے مراکز کا ذاتی طور پر دورہ کرنا لازمی تھا۔ نئے نظام کے تحت اہل صارفین نادرا کی شرائط کے مطابق پاک آئی ڈی ایپ کے ذریعے دور بیٹھے ہی تمام مراحل طے کر سکیں گے۔ یہ سہولت خاص طور پر ان سمندر پار پاکستانیوں کے لیے انتہائی مفید ثابت ہوگی جو پاکستان میں تجارتی سرگرمیوں سے وابستہ ہیں۔ اب وہ اس ڈیجیٹل حل کی بدولت پاکستان کا سفر کیے بغیر یا مراکز کے طویل چکر لگائے بغیر اپنی بائیو میٹرک تصدیق مکمل کر سکیں گے۔ پی ایس ڈبلیو کے مطابق اس منتقلی کو آسان بنانے کے لیے ایک عبوری مدت کے دوران دونوں ذرائع یعنی ڈیجیٹل ایپ اور ای سہولت مراکز بیک وقت فعال رہیں گے تاکہ صارفین اپنی سہولت کے مطابق طریقہ کار کا انتخاب کر سکیں۔ پی ایس ڈبلیو کے چیف ایگزیکٹو آفیسر سید آفتاب حیدر نے اس موقع پر اپنے خیالات کا اظہار کرتے ہوئے کہا کہ نادرا کی پاک آئی ڈی ایپ کے ساتھ انضمام پاکستان اور بیرون ملک مقیم دونوں کمیونٹیز کی ضروریات کو پورا کرنے کے ہمارے عزم کا منہ بولتا ثبوت ہے۔ انہوں نے مزید کہا کہ ریموٹ بائیو میٹرک تصدیق کو ممکن بنا کر ہم نے آن بورڈنگ کے عمل سے آخری جسمانی سفر کی ضرورت کو بھی ختم کر دیا ہے جس سے صارفین کا تجربہ مزید آسان اور قابل رسائی بن گیا ہے۔ اس ڈیجیٹل اقدام سے رجسٹریشن کے عمل میں درکار واحد جسمانی رکاوٹ بھی ختم ہو گئی ہے اور اب پورا عمل مکمل طور پر ڈیجیٹل انداز میں پایہ تکمیل کو پہنچ سکے گا۔ یہ قدم کاروباری برادری کے لیے طریقہ کار کو آسان بنانے، رسائی کو بہتر کرنے اور ڈیجیٹل حل کے فروغ کے لیے پی ایس ڈبلیو کے وسیع تر وژن کا ایک اہم حصہ ہے جس سے ملکی معیشت اور تجارت کے شعبے میں شفافیت اور تیزی آئے گی۔