امریکہ کا 250واں یوم آزادی، لاہور میں تقریب کا انعقاد

لاہور کے ایک مقامی ہوٹل میں امریکہ کے ڈھائی سوویں یوم آزادی کی خوشی میں ایک پروقار 'فریڈم 250' استقبالیہ تقریب کا انعقاد کیا گیا جس میں سیاسی شخصیات اور سفارتی حکام نے بڑی تعداد میں شرکت کی۔ اس تقریب کے دوران پاکستان اور امریکہ کے مابین دیرینہ تعلقات کو اجاگر کیا گیا اور دوطرفہ تعاون کے فروغ پر زور دیا گیا۔ تقریب کے دوران مختلف ثقافتی اور سفارتی سرگرمیاں بھی دیکھنے میں آئیں۔ تقریب سے خطاب کرتے ہوئے گورنر پنجاب سردار سلیم حیدر خان نے امریکی عوام اور حکومت کو یوم آزادی کی مبارکباد پیش کی۔ انہوں نے اپنے خطاب میں کہا کہ پاکستان اور امریکہ کے تعلقات تاریخی نوعیت کے ہیں اور دونوں ممالک کے درمیان مختلف شعبوں میں تعاون کو مزید وسعت دینے کی ضرورت ہے۔ انہوں نے اس عزم کا اعادہ کیا کہ عوامی سطح پر رابطے اور سفارتی تعلقات دونوں ممالک کے مفاد میں ہیں۔ تقریب سے اسپیکر پنجاب اسمبلی ملک محمد احمد خان نے بھی خطاب کیا اور امریکی قونصل خانے کے اس اقدام کو سراہا۔ انہوں نے کہا کہ اس طرح کی تقریبات ثقافتی تبادلے اور باہمی افہام و تفہیم کو بڑھانے میں اہم کردار ادا کرتی ہیں۔ اس موقع پر لاہور میں متعین امریکی قونصل جنرل سٹیٹسن سینڈرز نے مہمانوں کا خیرمقدم کیا اور قونصل خانے کے عملے کے ساتھ یادگار گروپ فوٹو بھی بنوایا۔ تقریب کے اختتام پر شرکاء نے پاکستان اور امریکہ کے تعلقات کے مستقبل کے حوالے سے نیک خواہشات کا اظہار کیا۔