ایمیزون کے جنگلات میں قدیم آثار کی دریافت، لیڈار ٹیکنالوجی کا استعمال

ماہرینِ آثارِ قدیمہ نے جدید فضائی سروے اور لیڈار (LiDAR) ٹیکنالوجی کا استعمال کرتے ہوئے ایمیزون کے گھنے جنگلات کے نیچے چھپے ہوئے سیکڑوں قدیم زمینی آثار دریافت کر لیے ہیں۔ سائنسی جریدے 'نیچر' میں شائع ہونے والی اس حیرت انگیز تحقیق نے دنیا بھر کے محققین کی توجہ اپنی جانب مبذول کروا لی ہے۔ جنگلات کی گھنی چھتری تبے چھپے ان آثار کے بارے میں طویل عرصے سے اندازہ لگایا جا رہا تھا، تاہم اب جدید لیزر ٹیکنالوجی نے اس بات کی تصدیق کر دی ہے کہ ماضی میں یہاں ایک متحرک اور منظم تہذیب آباد تھی۔ محققین کے مطابق، اس وسیع و عریض فضائی سروے کے دوران تقریباً چار سو کے قریب ایسے آثار سامنے آئے ہیں جن کے بارے میں اس سے پہلے کوئی ریکارڈ موجود نہیں تھا۔ یہ زمین دوز اسٹرکچرز یا ارتھ ورکس اس بات کا ثبوت ہیں کہ ایمیزون کے جنگلات کو ہمیشہ سے غیر آباد یا ویران نہیں سمجھا جانا چاہیے، بلکہ ہسپانوی اور یورپی تسلط سے پہلے یہاں بڑی انسانی بستیاں موجود تھیں۔ ان آثار میں مختلف جیومیٹریکل اشکال اور دفاعی یا سماجی سرگرمیوں کے لیے استعمال ہونے والی جگہیں شامل ہیں، جو اس دور کے لوگوں کی انجینئرنگ اور تعمیراتی صلاحیتوں کو ظاہر کرتی ہیں۔ لیڈار ٹیکنالوجی نے ماہرینِ آثارِ قدیمہ کے لیے اس گھنے اور دشوار گزار جنگل کے رازوں سے پردہ اٹھانا ممکن بنایا ہے۔ یہ ٹیکنالوجی لیزر شعاعوں کا استعمال کرتے ہوئے درختوں اور پودوں کے کینوس کو عبور کر کے براہ راست زمینی سطح کا تھری ڈی نقشہ تیار کرتی ہے۔ اس طریقے سے محققین کو وہ چیزیں بھی نظر آ جاتی ہیں جو انسانی آنکھ یا روایتی سیٹلائٹ تصاویر سے پوشیدہ رہتی ہیں۔ اس نئی دریافت سے تاریخ کے کئی ان سلجھے سوالات کے جواب ملنے کی توقع کی جا رہی ہے۔ اس اہم سائنسی پیش رفت کے بعد اب ماہرینِ آثارِ قدیمہ کی ٹیمیں ان مقامات کا زمینی دورہ کرنے کی تیاری کر رہی ہیں تاکہ مزید سائنسی تجزیے اور کھدائی کا کام شروع کیا جا سکے۔ اس تحقیق سے نہ صرف جنوبی امریکہ کی قدیم تاریخ کے نئے باب روشن ہوں گے بلکہ یہ بھی معلوم ہو سکے گا کہ قدیم انسان کس طرح ایمیزون کے ماحول کے ساتھ مطابقت پیدا کر کے زندگی بسر کرتا تھا۔