شمالی وزیرستان میں سکیورٹی فورسز کا آپریشن، 8 دہشت گرد ہلاک

اسلام آباد اور پشاور سے موصول ہونے والی اطلاعات کے مطابق خیبر پختونخوا کے قبائلی ضلع شمالی وزیرستان میں سکیورٹی فورسز نے ایک کامیاب انٹیلی جنس بیسڈ آپریشن (آئی بی او) کے دوران فتنہ الخوارج سے تعلق رکھنے والے آٹھ دہشت گردوں کو ہلاک کر دیا۔ سکیورٹی ذرائع کے مطابق یہ کارروائی خفیہ اطلاعات کی بنیاد پر کی گئی جس کا مقصد علاقے میں چھپے ہوئے تخریب کاروں کا قلعہ قمع کرنا تھا۔ کارروائی کے دوران دہشت گردوں کے زیر استعمال تمام ٹھکانوں کو بھی مکمل طور پر تباہ کر دیا گیا ہے تاکہ وہ دوبارہ وہاں پناہ نہ لے سکیں۔ ذرائع کا مزید کہنا ہے کہ اس کارروائی کے دوران دہشت گردوں نے اپنے مذموم مقاصد کے لیے ایک مسجد کو ڈھال کے طور پر استعمال کرنے کی کوشش کی تاکہ وہ سکیورٹی فورسز کی گرفت سے بچ سکیں۔ تاہم، سکیورٹی فورسز نے انتہائی پیشہ ورانہ مہارت اور حکمت عملی کا مظاہرہ کرتے ہوئے مسجد کے تقدس کو مکمل طور پر ملحوظِ خاطر رکھا اور انتہائی نپی تلی کارروائی کرتے ہوئے دہشت گردوں کے عزائم کو خاک میں ملا دیا۔ اس بات کو یقینی بنایا گیا کہ کارروائی کے دوران عبادت گاہ کو کوئی نقصان نہ پہنچے۔ وفاقی وزیر داخلہ محسن نقوی نے شمالی وزیرستان میں کامیاب آپریشن پر سکیورٹی فورسز کے جوانوں کو زبردست خراج تحسین پیش کیا ہے۔ اپنے ایک بیان میں انہوں نے کہا کہ خیبر پختونخوا دہشت گردی کے خلاف جنگ میں فرنٹ لائن پر موجود ہے اور ہماری سکیورٹی فورسز ملک سے اس ناسور کو جڑ سے اکھاڑ پھینکنے کے لیے پرعزم ہیں۔ انہوں نے مزید کہا کہ پوری قوم کو اپنے ان بہادر بیٹوں پر فخر ہے جنہوں نے ایک بار پھر دشمن کے تمام ناپاک عزائم کو ناکام بنا دیا اور ملک کی سلامتی کے دفاع میں اپنی پیشہ ورانہ قابلیت کا لوہا منوایا۔ واضح رہے کہ حالیہ چند ہفتوں کے دوران خیبر پختونخوا اور بلوچستان میں دہشت گردانہ کارروائیوں میں کچھ اضافہ دیکھا گیا ہے جس کے بعد سکیورٹی فورسز نے ملک بھر بالخصوص سرحدی علاقوں میں انسداد دہشت گردی کی کارروائیوں کو مزید تیز کر دیا ہے۔ پی آئی سی ایس ایس کے اعداد و شمار کے مطابق اگست کے مہینے میں صوبے میں سکیورٹی خدات اور حملوں میں اضافہ ریکارڈ کیا گیا جس کے جواب میں پاک فوج اور دیگر قانون نافذ کرنے والے اداروں نے انٹیلی جنس کی بنیاد پر آپریشنز کا دائرہ کار وسیع کر دیا ہے تاکہ ملک کو امن کا گہوارہ بنایا جا سکے۔