وزیراعظم شہباز شریف کی یورپی یونین کے صدور سے ملاقات، جی ایس پی پلس پر بات چیت

وزیرِ اعظم شہباز شریف نے نیویارک میں اقوام متحدہ کی جنرل اسمبلی کے اجلاس کے موقع پر یورپی کونسل کے صدر انتونیو لوئس سانٹوس دا کوسٹا اور یورپی کمیشن کی صدر ارسلا وان ڈیر لیین سے اہم ملاقات کی۔ وزیراعظم آفس کے مطابق ملاقات کے دوران فریقین نے پاکستان اور یورپی یونین کے تعلقات کے تمام پہلوؤں کا جائزہ لیا اور اعلیٰ سطح کے تبادلوں میں بڑھتی ہوئی رفتار پر اطمینان کا اظہار کیا۔ وزیراعظم شہباز شریف نے اس بات پر زور دیا کہ دونوں شراکت داروں کے درمیان تعلقات کو مزید تقویت دینے کے لیے مسلسل قیادت کی سطح پر رابطہ کاری انتہائی اہمیت کی حامل ہے۔ انہوں نے یورپی یونین کے ساتھ اپنے وسیع البنیاد شراکت داری کو مزید مستحکم کرنے اور پاک-یورپی یونین اسٹریٹجک انگیجمنٹ پلان پر مکمل عمل درآمد کے عزم کا اعادہ کیا۔ ملاقات کے دوران علاقائی اور عالمی صورتحال پر بھی تبادلہ خیال کیا گیا اور بین الاقوامی قانون اور بات چیت کے ذریعے مسائل کے پرامن حل کی اہمیت کو اجاگر کیا گیا۔ یورپی کمشنر نے پاکستان کے ساتھ شراکت داری کو سراہتے ہوئے کہا کہ دونوں فریقین تجارت سے لے کر غیر قانونی ہجرت کے تدارک تک تمام امور پر مل کر کام کر رہے ہیں۔ اس کے علاوہ، ملاقات میں مالی اعانت کے معاہدوں اور توانائی و ماحولیاتی لچک کے امور پر بھی بات کی گئی۔ وزیراعظم شہباز شریف نے اس موقع پر یورپی یونین کے رہنماؤں کو پاکستان کے دورے کی دعوت بھی دی تاکہ باہمی فائدے کی شراکت داری کو مزید گہرا کیا جا سکے۔