ایمان مزاری کیس: اڈیالہ جیل سپرنٹنڈنٹ کو توہین عدالت کا نوٹس

اسلام آباد کی ایک انسدادِ دہشت گردی عدالت (اے ٹی سی) نے ہفتے کے روز اڈیالہ جیل کے سپرنٹنڈنٹ کو توہینِ عدالت کا نوٹس جاری کر دیا ہے۔ یہ نوٹس مبینہ طور پر ایمان زینب حاضر مزاری اور ہادی علی چٹھہ کی ضمانت کی درخواستیں دائر کرنے کے لیے درکار پاور آف اٹارنی یعنی وکالت ناموں پر دستخط کرانے اور ان کی ترسیل کو یقینی نہ بنانے پر جاری کیا گیا ہے۔ منگل کے روز عدالت نے وکالت نامے دستخط شدہ نہ ہونے کی وجہ سے کوہسر پولیس اسٹیشن احتجاج کیس میں انسانی حقوق کے وکلاء ایمان اور ہادی کی جانب سے دائر ضمانت کی درخواستیں واپس کر دی تھیں۔ سماعت کے دوران اے ٹی سی کے جج طاہر عباس سپرا نے جیل سپرنٹنڈنٹ کو ہدایت کی کہ وہ وضاحت کریں کہ عدالتی احکامات عدولی کرنے پر کیوں نہ انہیں چھ ماہ قید کی سزا سنائی جائے۔ سماعت کے دوران اڈیالہ جیل کا کوئی نمائندہ عدالت میں پیش نہیں ہوا جبکہ دونوں ملزمان کو بھی پچھلی ہدایات کے باوجود ویڈیو لنک کے ذریعے عدالت میں پیش نہیں کیا گیا۔ ڈاکٹر شیریں مزاری اور بڑی تعداد میں وکلاء اس موقع پر عدالت میں موجود تھے۔ جج نے جیل حکام کی جانب سے ایمان اور ہادی کے وکالت ناموں پر دستخط کرانے میں ناکامی پر شدید برہمی کا اظہار کیا، جو ضمانت کی کارروائی میں وکلاء کی نمائندگی کے لیے انتہائی ضروری ہیں۔ جج طاہر عباس سپرا نے ریمارکس دیے کہ جیل سپرنٹنڈنٹ عدالت کو اور نہ ہی خود کو کسی مشکل میں ڈالیں۔ عدالت نے استفسار کیا کہ آیا ڈپٹی سپرنٹنڈنٹ نے متعلقہ دن سیشن کورٹ سے وکالت نامے حاصل کیے تھے یا نہیں۔ وکیل ریاست علی آزاد نے عدالت کو بتایا کہ انہیں یقین نہیں ہے کہ دستاویزات عدالت سے وصول کی گئی ہیں یا نہیں۔ انہوں نے کہا کہ وکلاء نے عدالتی حکم کی تعمیل میں سیشن کورٹ میں وکالت نامے جمع کرائے تھے تاکہ انہیں آگے اڈیالہ جیل بھیجا جا سکے۔ عدالت کے عملے نے جج کو بتایا کہ انٹرنیٹ کنیکٹیویٹی کے مسائل کے عذر کی وجہ سے ایمان اور ہادی کو ویڈیو لنک پر پیش نہیں کیا گیا۔ جج نے اس وضاحت پر عدم اطمینان کا اظہار کرتے ہوئے یاد دلایا کہ جیل حکام پہلے بھی کئی بار ایسے عذر پیش کر چکے ہیں۔ عدالت نے اس معاملے پر مزید کارروائی منگل تک ملتوی کر دی ہے۔