بھارت اور نیپال میں سیلاب اور لینڈ سلائیڈنگ سے ہلاکتیں

بھارت اور نیپال میں حالیہ طوفانی بارشوں کے نتیجے میں پیدا ہونے والی ہنگامی صورتحال کے دوران سیلاب اور تودے گرنے کے مختلف حادّثات میں مرنے والوں کی تعداد کم از کم 68 تک پہنچ گئی ہے۔ حکام کے مطابق گزشتہ تین دنوں سے جاری اس شدید بارش کے سلسلے کی وجہ سے دونوں ممالک کے کئی حصوں میں دریاؤں کا پانی خطرے کے نشان سے اوپر چلا گیا ہے، جس سے بڑے پیمانے پر تباہی مچی ہے۔ بھارتی حکام کا کہنا ہے کہ ملک کے متاثرہ علاقوں میں دریائوں میں طغیانی کے باعث زمینی راستے منقطع ہو چکے ہیں اور ہزاروں افراد کٹ کر رہ گئے ہیں۔ ریسکیو ٹیمیں اور ڈیزاسٹر مینجمنٹ کے ادارے متاثرہ علاقوں میں امدادی کارروائیاں تیزی سے انجام دے رہے ہیں تاکہ پھنسے ہوئے افراد کو محفوظ مقامات پر منتقل کیا جا سکے اور خوراک و طبی امداد فراہم کی جا سکے۔ دوسری جانب نیپال میں بھی موسلا دھار بارشوں کے باعث پہاڑی علاقوں میں لینڈ سلائیڈنگ کے متعدد حادّثات رونما ہوئے ہیں جن میں اب تک 12 افراد کی ہلاکت کی تصدیق کی جا چکی ہے۔ نیپالی حکام نے خطرے کے پیش نظر ندی نالوں کے قریب رہنے والے مکینوں کو فوری طور پر محفوظ مقامات پر منتقلی کی ہدایات جاری کی ہیں جبکہ مواصلاتی نظام درہم برہم ہونے کی وجہ سے امدادی سرگرمیوں میں مشکلات کا سامنا ہے۔ موسمیاتی ماہرین نے خبردار کیا ہے کہ آئندہ چند روز کے دوران بارش کا یہ سلسلہ مزید جاری رہ سکتا ہے جس سے صورتحال مزید سنگین ہونے کا خدشہ ہے۔ دونوں ممالک کی حکومتیں ہنگامی بنیادوں پر متاثرہ اضلاع میں ریلیف کیمپ قائم کر رہی ہیں اور عوام سے اپیل کی گئی ہے کہ وہ غیر ضروری سفر سے گریز کریں اور انتظامیہ کی ہدایات پر سختی سے عمل کریں۔