اسرائیلی وزیر بیزالیل سموٹرچ کا مغربی کنارے اور لبنان پر قبضے کا مطالبہ

اسرائیل کے انتہائی دائیں بازو کے وزیر خزانہ بیزالیل سموٹرچ نے اتوار کے روز ایک متنازعہ بیان میں جنوبی لبنان اور غزہ کی پٹی کے کچھ حصوں کو اسرائیل میں ضم کرنے کا مطالبہ کیا ہے۔ اس کے ساتھ ہی انہوں نے مطالبہ کیا ہے کہ اسرائیلی فورسز کو مقبوضہ مغربی کنارے میں فلسطینیوں کے خلاف بھرپور جنگ شروع کر دینی چاہیے۔ ایک اسرائیلی خبر رساں ویب سائٹ کے پوڈ کاسٹ میں گفتگو کرتے ہوئے ان کا کہنا تھا کہ وہ چاہتے ہیں کہ اسرائیل کم از کم غزہ میں 'یلو لائن' اور لبنان میں دریائے لیتانی تک کے علاقوں کو اپنے اندر ضم کر لے۔ ان کا مزید کہنا تھا کہ اگر جنگ انہی سرحدوں پر ختم ہوتی ہے جہاں سے یہ شروع ہوئی تھی تو اس سے دشمن کو دوبارہ جنگ چھیڑنے سے کیا چیز روکے گی۔ 'یلو لائن' سے مراد وہ علاقہ ہے جو 7 اکتوبر 2023 کو حماس کے حملے کے بعد سے اسرائیلی فوجی کنٹرول کے تحت ہے۔ بیزالیل سموٹرچ نے یہ بھی کہا کہ اسرائیل کو یہودا اور سامرا یعنی مغربی کنارے میں جنگ کا آغاز کرنا چاہیے تاکہ اس فلسطینی اتھارٹی کا خاتمہ کیا جا سکے جو ان کے بقول دہشت گردی کی حمایت کرتی ہے۔ واضح رہے کہ سموٹرچ ایک ایسی انتہائی دائیں بازو کی جماعت کی قیادت کرتے ہیں جو 1967 سے اسرائیل کے زیر قبضہ مغربی کنارے کو باضابطہ طور پر اسرائیل کا حصہ بنانے کی حامی ہے۔ دوسری جانب، رام اللہ میں قائم فلسطینی اتھارٹی نے اسرائیلی وزیر کے اس بیان کی شدید مذمت کرتے ہوئے اسے کشیدگی بڑھانے اور فلسطینی ریاست کے قیام کو سبوتاژ کرنے کی صریح کوشش قرار دیا ہے۔ مغربی کنارے میں پہلے ہی غزہ تنازع کے آغاز سے لے کر اب تک تشدد میں نمایاں اضافہ دیکھا گیا ہے۔ فلسطینی حکام کے مطابق اس دوران اسرائیلی فوجیوں اور آباد کاروں کے ہاتھوں 1100 سے زائد فلسطینی ہلاک ہو چکے ہیں جبکہ دوسری جانب اسرائیلی اعداد و شمار کے مطابق مختلف حملوں اور کارروائیوں میں کم از کم 49 اسرائیلی بھی ہلاک ہوئے ہیں۔ بین الاقوامی قوانین کے تحت مغربی کنارے کی تمام اسرائیلی بستیوں کو غیر قانونی قرار دیا جاتا ہے جہاں اس وقت پانچ لاکھ سے زائد اسرائیلی آباد ہیں۔