جنوبی افریقا فائرنگ واقعہ 27 جاں بحق عالمی خبریں

جنوبی افریقا کے دو اہم شہروں میں پیش آنے والے خونریز فائرنگ کے دو الگ الگ واقعات میں کم از کم 27 افراد ہلاک ہو گئے ہیں۔ پولیس کے مطابق پہلا واقعہ جوہانسبرگ کے مغرب میں واقع ایک نیم دیہی علاقے کے بار میں پیش آیا، جہاں آٹھ مسلح افراد نے اچانک دھاوا بول دیا۔ حملہ آوروں نے جدید خودکار ہتھیاروں کا استعمال کرتے ہوئے باہر موجود گاہکوں پر اندھا دھند گولیاں برسائیں اور پھر اندر داخل ہو کر مزید فائرنگ کی۔ اس ہولناک حملے میں 13 مردوں سمیت 17 افراد موقع پر ہی جاں بحق جبکہ 15 دیگر شدید زخمی ہو گئے۔ پولیس حکام کا کہنا ہے کہ ابتدائی تحقیقات سے ظاہر ہوتا ہے کہ یہ حملہ گزشتہ ماہ پیش آنے والے ایک واقعے کا انتقام ہو سکتا ہے، کیونکہ مقتولین میں سے ایک شخص کو پولیس کی طرف سے تلاش کیا جا رہا تھا۔ حملہ آور فرار ہونے سے پہلے دو گاڑیوں کو آگ بھی لگا گئے۔دوسری جانب ایک اور واقعے میں کیپ ٹاؤن کے قریب واقع ایک تفریحی مقام پر اتوار کے روز علی الصبح نامعلوم مسلح افراد نے فائرنگ کر کے 10 افراد کو موت کے گھاٹ اتار دیا اور 11 کو زخمی کر دیا۔ سوشل میڈیا پر وائرل ہونے والی ویڈیوز میں دیکھا جا سکتا ہے کہ لوگ خوشیاں منا رہے تھے کہ اچانک فائرنگ شروع ہو گئی جس سے بھگدڑ مچ گئی۔ ان میں سے پانچ افراد موقع پر ہی دم توڑ گئے جبکہ دیگر نے اسپتال منتقلی کے دوران دم توڑا۔ پولیس نے تاحال دونوں معاملات میں کسی گرفتاری کی تصدیق نہیں کی ہے اور تحقیقات جاری رکھی ہیں۔ جنوبی افریقا میں بڑھتے ہوئے پرتشدد جرائم اور بندوق کے استعمال نے سکیورٹی اداروں کو ہلا کر رکھ دیا ہے۔ ملک میں یومیہ قتل کی شرح دنیا میں سب سے بلند ترین سطح پر شمار کی جاتی ہے، جہاں قانونی اور غیر قانونی اسلحے کی بھرمار ہے۔ حکومت اور قانون نافذ کرنے والے ادارے اس تشویشناک صورتحال پر قابو پانے کے لیے فوج کی مدد بھی حاصل کر رہے ہیں لیکن اس کے باوجود جرائم پیشہ افراد کے حوصلے پست نہیں ہو رہے۔ تازہ ترین واقعات نے عوام میں خوف و ہراس پھیلا دیا ہے اور حکومت سے سخت اقدامات کا مطالبہ کیا جا رہا ہے۔