کراچی میں پاسپورٹ اور شناختی کارڈ کے لیے ون اسٹاپ فسیلیٹیشن سینٹر بنے گا

وفاقی وزیر داخلہ محسن نقوی نے اپنے دورہ کراچی کے دوران شہر میں ایک بہت بڑے پبلک فسیلیٹیشن سینٹر کے قیام کا اعلان کیا ہے، جس کا مقصد شہریوں کو پاسپورٹ، شناختی کارڈ اور دیگر اہم سرکاری خدمات ایک ہی چھت کے نیچے فراہم کرنا ہے۔ وزارت داخلہ کے جاری کردہ بیان کے مطابق، یہ سینٹر پاکستان کا سب سے بڑا عوامی سہولت مرکز ہوگا جہاں وزارت داخلہ کے ماتحت کام کرنے والے تمام محکموں اور اداروں کے کاؤنٹرز قائم کیے جائیں گے۔ اس سہولت کے تحت اب شہریوں کو الگ الگ دفاتر کے چکر نہیں کاٹنے پڑیں گے بلکہ وہ پاسپورٹ، کمپیوٹرائزڈ قومی شناختی کارڈ، اسلحہ لائسنس، مختلف این او سیز اور دیگر ضروری دستاویزات ایک ہی مقام سے حاصل کر سکیں گے۔ اس دورے کے دوران وزیر داخلہ محسن نقوی نے متعلقہ حکام کو سخت ہدایات جاری کرتے ہوئے کہا کہ اس فسیلیٹیشن سینٹر کا ماسٹر پلان آئندہ دس دنوں کے اندر تیار کر کے پیش کیا جائے۔ انہوں نے اس بات پر زور دیا کہ ماسٹر پلان تیار کرتے وقت تمام ضروری تقاضوں اور شہریوں کی سہولت کو مدنظر رکھا جائے تاکہ مستقبل میں کسی قسم کی دشواری کا سامنا نہ ہو۔ وزیر داخلہ نے یہ بھی ہدایت کی کہ اس مرکز کے قیام کے لیے تمام ضروری اقدامات فوری طور پر یقینی بنائے جائیں تاکہ منصوبے پر جلد از جلد عمل درآمد شروع ہو سکے۔ اس کے علاوہ، محسن نقوی نے کراچی پورٹ کا بھی دورہ کیا جہاں چین سے آنے والی اسلام آباد ریسکیو 1122 اور فائر بریگیڈ کے لیے 21 نئی جدید گاڑیوں کا معائنہ کیا۔ سترہ سال کے طویل وقفے کے بعد آنے والی ان گاڑیوں کے حوالے سے گفتگو کرتے ہوئے انہوں نے کہا کہ یہ اسلام آباد کے ریسکیو نظام میں سنہ 2009 کے بعد سے سب سے بڑی توسیع ہے۔ انہوں نے چینی حکومت کا شکریہ ادا کیا کہ انہوں نے ان نئی گاڑیوں کی فراہمی میں تیزی دکھائی۔ وزارت داخلہ کے مطابق یہ جدید ترین گاڑیاں، جن میں فضائی فائر ٹرک اور فائر ٹاورز شامل ہیں، اسلام آباد کے چھ مختلف اسٹیشنوں پر چوبیس گھنٹے دستیاب رہیں گی اور 256 فٹ کی بلندی تک آپریشن کرنے کی صلاحیت رکھتی ہیں۔