نریندر مودی اور ڈونلڈ ٹرمپ کی ٹیلیفونک گفتگو، تجارتی معاہدے پر بات چیت

نئی دہلی: بھارتی وزیر اعظم نریندر مودی اور امریکی صدر ڈونلڈ ٹرمپ کے درمیان حال ہی میں ایک اہم ٹیلیفونک رابطہ ہوا ہے جس میں دونوں رہنماؤں نے دوطرفہ تعلقات کو مزید مضبوط بنانے اور اسٹریٹجک شراکت داری کو آگے بڑھانے کے عزم کا اعادہ کیا ہے۔ اس گفتگو کے دوران تجارت، دفاع، توانائی اور اہم ٹیکنالوجی کے شعبوں میں باہمی تعاون کا تفصیلی جائزہ لیا گیا۔ بھارتی وزیر اعظم نے سوشل میڈیا پلیٹ فارم ایکس پر اپنے پیغام میں اس بات کی تصدیق کی کہ دونوں رہنماؤں نے جامع عالمی اسٹریٹجک شراکت داری کو وسعت دینے کے لیے قریبی رابطے برقرار رکھنے پر اتفاق کیا ہے۔ اس کے علاوہ خطے اور دنیا کے دیگر اہم امور پر بھی تبادلہ خیال کیا گیا جس کا مقصد عالمی امن و سلامتی کے لیے جاری کوششوں کو تقویت دینا ہے۔ یہ اعلیٰ سطحی رابطہ ایک ایسے وقت میں سامنے آیا ہے جب بھارت کے وزیر تجارت پیوش گوئل امریکہ کے دورے پر موجود ہیں۔ پیوش گوئل کا یہ دورہ دونوں ممالک کے درمیان ایک متوازن اور باہمی طور پر مفید دوطرفہ تجارتی معاہدے کو حتمی شکل دینے کی کوششوں کا حصہ ہے۔ اطلاعات کے مطابق، بھارتی وزیر تجارت اس دوران امریکی حکام اور تجارتی نمائندوں سے ملاقاتیں کر رہے ہیں تاکہ ایک عبوری تجارتی انتظامات کو طے کیا جا سکے جو طویل عرصے سے زیر التوا مذاکرات میں پیش رفت لا سکیں۔ بھارتی وزارت تجارت کے مطابق، پیوش گوئل نے اپنے دورے کے دوران امریکی مینوفیکچرنگ اور ٹیکنالوجی کمپنیوں کے اعلیٰ عہدیداروں سے بھی ملاقات کی اور دوطرفہ اقتصادی روابط کو فروغ دینے کے امکانات پر غور کیا۔ اس کے علاوہ وہ وسکونسن میں ہونے والے جی ٹوئنٹی وزرائے تجارت کے اجلاس میں بھی شرکت کے لیے موجود ہیں جہاں امریکی تجارتی نمائندے جیمیسن گرین کی دعوت پر مختلف امور پر بات چیت کی جائے گی۔ واضح رہے کہ بھارت اور امریکہ کے درمیان کئی ماہ سے جاری تجارتی مذاکرات کے باوجود تحال کسی حتمی معاہدے پر اتفاق نہیں ہو سکا ہے کیونکہ نئی دہلی مجوزہ معاہدے میں بہتر اور سازگار شرائط کا خواہاں ہے۔ اس کے علاوہ بھارتی حکام نے واشنگٹن کو واضح کر دیا ہے کہ روس سے تیل کی خریداری کے معاملے پر امریکی ٹیرف کے اقدامات دوطرفہ تعلقات کو متاثر کر سکتے ہیں، جس کی وجہ سے موجودہ دورہ انتہائی اہمیت کا حامل سمجھا جا رہا ہے۔