عبدالعلیم خان کا این ایچ اے کو روڈ انجینئرنگ میں غیر ملکی ماہرین کی خدمات کا حکم

اسلام آباد میں وفاقی وزیر مواصلات عبدالعلیم خان کی زیر صدارت نیشنل ہائی وے اتھارٹی (این ایچ اے) کا ایک اہم اجلاس منعقد ہوا جس میں جاری اور مجوزہ ترقیاتی منصوبوں، آمدنی میں اضافے اور روڈ سیفٹی کے امور کا تفصیلی جائزہ لیا گیا۔ اس موقع پر گفتگو کرتے ہوئے وفاقی وزیر نے این ایچ اے حکام کو ہدایت کی کہ نئے ہائی ویز کی تعمیر کے دوران بہتر انجینئرنگ کے ذریعے روڈ سیفٹی کو ہر صورت یقینی بنایا جائے کیونکہ انسانی جانوں کا تحفظ حکومت کی اولین ترجیح ہے۔ انہوں نے ایم فور اور دیگر شاہراہوں کے ڈیزائن پر تحفظات کا اظہار کرتے ہوئے اس بات پر زور دیا کہ پاکستان کی سڑکیں سبز، محفوظ، آرام دہ اور جدید بین الاقوامی معیار کے مطابق ہونی چاہئیں۔اجلاس کے دوران یہ فیصلہ بھی کیا گیا کہ سڑکوں کی انجینئرنگ اور ہائی وے ڈیزائن کو بہتر بنانے کے لیے غیر ملکی ماہرین کی خدمات حاصل کی جائیں تاکہ اتھارٹی کا انجینئرنگ عملہ بین الاقوامی بہترین طریقوں کو اپنا سکے۔ عبدالعلیم خان کا کہنا تھا کہ موٹر ویز کو مسافروں کے لیے مزید محفوظ اور آرام دہ بنایا جائے۔ انہوں نے کہا کہ این ایچ اے نے دو سال قبل مقرر کردہ ریونیو بڑھانے کا ہدف کامیابی سے حاصل کر لیا ہے اور مستقبل میں نئے راستوں کی تعمیر کا کام موجودہ ریونیو اسٹریمز سے حاصل ہونے والی آمدنی سے ہی کیا جائے گا۔ وفاقی وزیر نے اجلاس کو آگاہ کیا کہ آنے والے مہینوں میں وزیر اعظم شہباز شریف لودھراں ملتان ایکسپریس وے، پشاور نارتھ بائی پاس اور پنڈی بھٹیاں فیصل آباد موٹر وے کی توسیع جیسے بڑے منصوبوں کا افتتاح کریں گے۔ انہوں نے لاہور گوجرانوالہ جی ٹی روڈ کی خستہ حالی پر گہری تشویش کا اظہار کرتے ہوئے متعلقہ حکام کو فوری اقدامات کرنے کا حکم بھی دیا۔