کراچی میں گیس کی تیز بو: ایس ایس جی سی کی وضاحت

سوئی سدرن گیس کمپنی (SSGC) نے اتوار کے روز کراچی کے مختلف علاقوں میں صارفین کی جانب سے گیس کی تیز بو محسوس کیے جانے کی شکایات پر اہم وضاحت جاری کی ہے۔ ترجمان ایس ایس جی سی کے مطابق، شہر کے کچھ حصوں میں جو گیس کی بو محسوس کی جا رہی ہے، اس کی بنیادی وجہ گیس میں شامل کیے جانے والے مادہ یعنی اوڈورینٹ (odorant) کی مقدار میں عارضی اضافہ ہے۔ یہ اضافہ کسی تکنیکی خرابی یا گیس لیکج کی وجہ سے نہیں بلکہ باقاعدہ حفاظتی اقدامات اور تنصیب کے عمل کا حصہ ہے۔ ترجمان نے مزید بتایا کہ اس وقت کمپنی کے اوڈورائزیشن پلانٹس کی جانچ پڑتال کا عمل جاری ہے۔ یہ تمام ٹیسٹنگ نئے گائیس پائپ لائن نیٹ ورک کی کمیشننگ کا ایک اہم حصہ ہے تاکہ مستقبل میں صارفین کو بلاتعطل اور محفوظ گیس کی فراہمی یقینی بنائی جا سکے۔ حکام کا کہنا ہے کہ پائپ لائن سسٹم کو فعال کرنے سے پہلے اس کی ترسیلی صلاحیت اور حفاظتی معیارات کو جانچنا ضروری ہوتا ہے، جس کے دوران گیس کی بو میں عارضی طور پر تیزی آ جاتی ہے۔ سوئی سدرن گیس کمپنی نے کراچی کے تمام متاثرہ علاقوں کے رہائشیوں کو پرسکون رہنے کی اپیل کرتے ہوئے کہا ہے کہ اس بو سے گھبرانے کی کوئی ضرورت نہیں ہے۔ ترجمان نے واضح کیا کہ نظام مکمل طور پر محفوظ ہے اور شہری اپنے روزمرہ کے معمولات بلا کسی خوف و خطر جاری رکھ سکتے ہیں۔ کمپنی کا ایمرجنسی عملہ کسی بھی ہنگامی صورتحال سے نمٹنے کے لیے ہائی الرٹ پر ہے تاکہ صارفین کو کسی قسم کی مشکل کا سامنا نہ کرناپڑے اور گیس کی ترسیل بلا تعطل جاری رہے۔