کور کمانڈرز کانفرنس: دہشت گردی کے خاتمے اور سیکیورٹی پر اہم فیصلے

راولپنڈی میں آرمی چیف جنرل سید عاصم منیر کی زیر صدارت 277ویں کور کمانڈرز کانفرنس منعقد ہوئی جس میں ملک کی مجموعی سیکیورٹی صورتحال، آپریشنل تیاریوں اور چیلنجز کا تفصیلی جائزہ لیا گیا۔ کانفرنس کے دوران عسکری قیادت نے اس عزم کا اعادہ کیا کہ ریاست کی رٹ کو چیلنج کرنے والے عناصر اور ملک میں بدامن پھیلانے والوں کے خلاف فیصلہ کن کارروائی عمل میں لائی جائے گی۔ تجزیہ کاروں نے فوج کی اعلیٰ قیادت کے اس عزم کو سراہتے ہوئے کہا ہے کہ ملک کو درپیش چیلنجز سے نمٹنے کے لیے سکیورٹی اداروں کا یہ مؤقف انتہائی بروقت اور اہم ہے۔ اجلاس کے شرکاء نے اس بات پر بھی زور دیا کہ ملک دشمن عناصر اور ان کے سہولت کاروں کے ناپاک عزائم کو ہر قیمت پر ناکام بنایا جائے گا تاکہ پاکستان میں پائیدار امن و استحکام کو یقینی بنایا جا سکے۔ کانفرنس میں خاص طور پر اس عزم کا اظہار کیا گیا کہ 9 مئی جیسے واقعات یا اس نوعیت کی کسی بھی نئی کوشش کو برداشت نہیں کیا جائے گا۔ عسکری قیادت نے واضح کیا کہ ریاست مخالف سرگرمیوں اور قانون ہاتھ میں لینے والوں کے خلاف آئین اور قانون کے مطابق بھرپور طاقت کا استعمال کیا جائے گا تاکہ مستقبل میں اس قسم کے پرتشدد واقعات کا سدباب کیا جا سکے۔ سیاسی اور دفاعی تجزیہ کاروں نے کور کمانڈرز کانفرنس کے اعلامیے کو سراہتے ہوئے کہا ہے کہ پاک فوج کی جانب سے دہشت گردی کے خلاف صفر برداشت کی پالیسی ملک کو اندرونی اور بیرونی خطرات سے محفوظ رکھنے کے لیے ناگزیر ہے۔ انہوں نے کہا کہ معاشی استحکام اور ملکی ترقی کے لیے امن و امان کا قیام سب سے پہلی شرط ہے، اور اس مقصد کے حصول کے لیے تمام قومی اداروں کو متحد ہو کر کام کرنا ہوگا۔ کانفرنس کے اختتام پر پاک فوج کی پیشہ ورانہ صلاحیتوں اور قربانیوں کو خراج تحسین پیش کیا گیا اور اس عزم کا اظہار کیا گیا کہ مادرِ وطن کے دفاع کے لیے کسی بھی قربانی سے دریغ نہیں کیا جائے گا۔