واٹس ایپ نے پرانے فونز کے لیے سپورٹ ختم کرنے کا اعلان کر دیا

دنیا کی مقبول ترین انسٹنٹ میسجنگ ایپلی کیشن واٹس ایپ نے ایک بار پھر پرانے آپریٹنگ سسٹمز کو سپورٹ نہ کرنے کا فیصلہ کیا ہے، جس کے تحت پرانے اینڈرائیڈ اور آئی او ایس (iOS) ڈیوائسز پر واٹس ایپ لاگ ان بلاک کیا جا رہا ہے۔ اس اقدام کا مقصد صارفین کو جدید ترین سکیورٹی فیچرز فراہم کرنا اور ایپ کی کارکردگی کو بہتر بنانا ہے۔ ٹیکنالوجی ذرائع کے مطابق جو صارفین اب بھی اپنے پرانے اسمارٹ فونز پر پرانے آپریٹنگ سسٹمز چلا رہے ہیں، انہیں آنے والے دنوں میں لاگ ان کرنے میں شدید مشکلات کا سامنا کرنا پڑ سکتا ہے۔ واٹس ایپ انتظامیہ کا کہنا ہے کہ پرانے سوفٹ ویئر ورژنز نئے سکیورٹی پروٹوکولز کو سپورٹ کرنے سے قاصر ہوتے ہیں، جس کی وجہ سے صارفین کا ڈیٹا ہیکنگ یا دیگر سائبر خطرات سے دوچار ہو سکتا ہے۔ یہی وجہ ہے کہ کمپنی ہر سال باقاعدگی سے ایسے پرانے سسٹمز کے لیے اپنی سپورٹ ختم کرتی ہے جن پر اب بہت کم صارفین فعال ہوتے ہیں۔ اس بار بھی ان صارفین کو نشانہ بنایا گیا ہے جو سالوں پرانے فونز اور آؤٹ ڈیٹڈ سافٹ ویئر استعمال کر رہے ہیں۔ ٹیکنالوجی ماہرین نے متاثرہ صارفین کو مشورہ دیا ہے کہ وہ فوری طور پر اپنے اسمارٹ فونز کی سیٹنگز میں جا کر اپنے آپریٹنگ سسٹم کو اپ ڈیٹ کریں یا پھر ایک نیا ڈیوائس خریدیں جو واٹس ایپ کے نئے تقاضوں پر پورا اترتا ہو۔ اگر آپ کا فون جدید اپ ڈیٹس کو سپورٹ نہیں کرتا تو آپ کا اکاؤنٹ لاگ آؤٹ ہو سکتا ہے اور آپ اس سروس سے محروم ہو سکتے ہیں۔ واٹس ایپ نے صارفین کو خبردار کیا ہے کہ وہ بروقت حفاظتی اقدامات کریں تاکہ وہ بلا تعطل اس سروس سے مستفید ہوتے رہیں۔