قطر کے قریب آئل ٹینکر پر حملہ، میری ٹائم ایجنسی کی تصدیق

قطر کے ساحل کے قریب سمندر میں سفر کرنے والے ایک آئل ٹینکر کو نامعلوم سمت سے داغے جانے والے متعدد پراجیکٹائلز لگنے کا سنگین واقعہ پیش آیا ہے۔ بین الاقوامی میری ٹائم ایجنسیوں اور برطانیہ کے میری ٹائم ٹریڈ آپریشنز (UKMTO) نے اس واقعے کی تصدیق کرتے ہوئے بتایا ہے کہ جہاز کو نقصان پہنچا ہے جبکہ متعلقہ حکام نے فوری طور پر امدادی کارروائیاں شروع کر دی ہیں۔ خلیجی خطے میں بڑھتی ہوئی کشیدگی اور بحری جہازوں پر حملوں کے تناظر میں یہ تازہ ترین واقعہ انتہائی تشویشناک قرار دیا جا رہا ہے۔ ذرائع کے مطابق آبنائے ہرمز اور گرد و نواح کے سمندری راستوں پر تیل بردار بحری جہازوں کو درپیش سیکیورٹی خدھات میں نمایاں اضافہ ہوا ہے، جس سے عالمی توانائی کی رسد بھی متاثر ہونے کا خطرہ پیدا ہو گیا ہے۔ اس سے قبل بھی خطے میں متعدد تجارتی اور تیل بردار بحری جہازوں کو نشانہ بنایا جا چکا ہے، جس کی وجہ سے بین الاقوامی شپنگ کمپنیوں نے اپنے روٹس پر نظر ثانی شروع کر دی ہے۔ حالیہ ہفتوں میں آبنائے ہرمز کے راستے ہونے والی تیل کی ترسیل پر دباؤ بڑھا ہے اور ایران سے منسلک کشیدگی کی وجہ سے حملوں کی تعداد میں بھی اضافہ ریکارڈ کیا گیا ہے۔ نیوی گیشن اداروں کا کہنا ہے کہ متاثرہ ٹینکر کے عملے کی سلامتی کے لیے قریبی ممالک کی بحریہ اور ریسکیو ٹیمیں فوری طور پر متحرک ہو گئی ہیں تاکہ کسی بھی بڑے انسانی یا ماحولیاتی نقصان کو روکا جا سکے۔ اس واقعے کے بعد انشورنس کمپنیوں نے بھی خلیجی خطے میں جانے والے جہازوں کے لیے خطرے کے بیمہ پریمیم بڑھانا شروع کر دیے ہیں، جس سے عالمی تجارت پر اضافی مالی بوجھ پڑ رہا ہے۔ دنیا بھر کے توانائی کے ماہرین نے اس صورتحال پر گہری تشویش کا اظہار کرتے ہوئے عالمی برادری سے مطالبہ کیا ہے کہ بحری راستوں کے تحفظ کو یقینی بنانے کے لیے فوری اور مؤثر اقدامات کیے جائیں تاکہ بین الاقوامی تجارت بلا تعطل جاری رہ سکے۔