بورڈو فٹ بال کلب کی چھٹی ڈویژن میں تنزلی

فرانس کے مایہ ناز فٹ بال کلب بورڈو کو مالیاتی بحران اور بے ضابطگیوں کے باعث ایک اور بڑے دھچکے کا سامنا کرنا پڑا ہے، جس کے نتیجے میں کلب کو چھٹی ڈویژن میں تنزلی کا سامنا کرنا پڑا ہے۔ تاریخ میں چھ بار فرانسیسی چیمپئن بننے والا یہ کلب اب ملک کے نچلے درجے کے فٹ بال مقابلوں میں حصہ لے گا۔ یہ وہی کلب ہے جہاں دنیائے فٹ بال کے لیجنڈ کھلاڑی زین الدین زیدان نے اپنے کیریئر کے ابتدائی دنوں میں نام بنایا تھا اور بین الاقوامی شہرت حاصل کی تھی۔ کلب کے مالی معاملات بگڑنے کے بعد فٹ بال حکام نے یہ سخت ترین فیصلہ کیا ہے۔ مالیاتی بے ضابطگیوں اور قرضوں کے بوجھ تلے دبنے کی وجہ سے کلب ریگولیٹری بورڈ کے قوانین پر پورا اترنے میں ناکام رہا، جس کے بعد انتظامی اور تادیبی کارروائی کرتے ہوئے یہ پابندیاں عائد کی گئیں۔ اس فیصلے سے نہ صرف کلب کی انتظامیہ کو شدید دھچکا لگا ہے بلکہ بورڈو کے لاکھوں مداحوں میں بھی سخت مایوسی پھیل گئی ہے جو اپنے پسندیدہ کلب کو اس زوال پذیر حالت میں دیکھ رہے ہیں۔ اس کے علاوہ کلب کے مستقبل کے حوالے سے بھی غیر یقینی کے بادل منڈلا رہے ہیں کیونکہ نچلی ڈویژن میں جانے سے مالی مشکلات مزید بڑھ سکتی ہیں۔ تجزیہ کاروں کے مطابق بورڈو جیسے تاریخی کلب کا اس سطح پر پہنچنا فرانسیسی فٹ بال کے لیے ایک لمحہ فکریہ ہے اور اس سے کلب کی بحالی کے لیے طویل اور مشکل سفر کا آغاز ہوتا ہے۔