پاکستان میں بارش اور طوفان: محکمہ موسمیات کی 10 سے 15 اکتوبر تک کی پیشگوئی

محکمہ موسمیات (پی ایم ڈی) نے جمعہ کے روز پیشگوئی کی ہے کہ رواں ہفتے کے آخر سے وقفے وقفے کے ساتھ ملک کے بالائی اور وسطی حصوں میں بارش، تیز ہواؤں، گرج چمک اور چند مقامات پر ژالہ باری کا امکان ہے۔ محکمہ موسمیات کی طرف سے جاری کردہ پریس ریلیز کے مطابق، ایک مغربی لہر ہفتے کے روز سے ملک کے بالائی علاقوں میں داخل ہونے کا امکان ہے جو 15 اکتوبر تک برقرار رہے گی۔ اس موسمی نظام کے زیر اثر کشمیر، گلگت بلتستان، خیبر پختونخوا، پنجاب اور اسلام آباد کے خطے میں بارش اور آندھی کے ساتھ گرج چمک کی توقع ہے۔ محکمہ موسمیات کے مطابق، کشمیر کے مختلف اضلاع جن میں نیلم ویلی، مظفر آباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور شامل ہیں، میں 10 سے 15 اکتوبر کے دوران وقفے وقفے سے بارش کی توقع ہے۔ اسی طرح گلگت بلتستان کے دیامیر، استور، غذر، سکردو، ہنزہ، گلگت، گھانچھے اور شگر میں بھی یہ موسمی سلسلہ جاری رہے گا۔ خیبر پختونخوا میں سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، پشاور، چارسدہ، نوشہرہ، مردان اور صوابی سمیت دیگر اضلاع میں بارش اور آندھی کی پیشگوئی کی گئی ہے۔ اس کے علاوہ اسلام آباد، راولپنڈی، مری، گلیات، اٹک، چکوال، جہلم، گوجرانوالہ، لاہور، فیصل آباد اور ملتان سمیت پنجاب کے مختلف شہروں میں بھی 10 سے 11 اور 13 سے 14 اکتوبر کے دوران بارش کا امکان ظاہر کیا گیا ہے۔ محکمہ موسمیات نے اپنے الرٹ میں خبردار کیا ہے کہ تیز ہواؤں، ژالہ باری اور اسمانی بجلی گرنے سے کمزور ڈھانچے جیسے بجلی کے کھمبے، سولر پینلز اور کچے مکانات کی چھتوں یا دیواروں کو نقصان پہنچ سکتا ہے۔ اس کے علاوہ ژالہ باری سے پنجاب اور خیبر پختونخوا کے میدانی علاقوں میں کھڑی فصلوں کو بھی نقصان کا خدشہ ہے۔ محکمہ موسمیات نے بلند پہاڑوں اور گلیشیئرز پر ہلکی برفباری کا امکان ظاہر کیا ہے جبکہ پیشگوئی کے دوران دن کے درجہ حرارت میں 2 سے 4 ڈگری سینٹی گریڈ کمی متوقع ہے۔ کسانوں کو ہدایت کی گئی ہے کہ وہ موسم کی صورتحال کو مدنظر رکھتے ہوئے اپنی زرعی سرگرمیوں کا انتظام کریں۔ تمام متعلقہ اداروں کو بھی ہدایت کی گئی ہے کہ وہ کسی بھی نا خوشگوار صورتحال سے بچنے کے لیے الرٹ رہیں اور ضروری اقدامات کریں۔