پاکستان کے نیوکلیئر سیکیورٹی نظام نے آئی پی پاس کا پہلا جائزہ پاس کر لیا

اسلام آباد میں بین الاقوامی ایٹمی توانائی ایجنسی (آئی اے ای اے) کے ماہرین کی ایک ٹیم نے پاکستان کے نیوکلیئر سیکیورٹی کے نظام کا بارہ روزہ جامع جائزہ مکمل کرنے کے بعد اسے انتہائی مضبوط اور مستحکم قرار دیا ہے۔ آئی اے ای اے کے انٹرنیشنل فزیکل پروٹیکشن ایڈوائزری سروس (IPPAS) مشن نے پاکستان کے جوہری مواد اور تنصیبات کے تحفظ کے لیے قائم کردہ قانونی اور ریگولیٹری فریم ورک کا اپنی نوعیت کا پہلا جائزہ لیا۔ مشن نے نوٹ کیا کہ سیکیورٹی کا یہ فریم ورک مخصوص جوہری تنصیبات میں بھی موثر طریقے سے نافذ کیا گیا ہے۔ آئی اے ای اے کی جانب سے جاری کردہ پریس ریلیز کے مطابق یہ نظام باقاعدہ وقفے وقفے سے ہونے والے جائزوں کے ذریعے مسلسل بہتر بنایا جا رہا ہے، جبکہ پاکستان کا صلاحیت سازی کا انفراسٹرکچر قومی اور بین الاقوامی سطح پر مہارت کو فروغ دے رہا ہے۔ سات رکنی مشن ٹیم کی قیادت مراکش کی نیوکلیئر اینڈ ریڈیولوجیکل سیفٹی اینڈ سیکیورٹی ایجنسی کے سابق ڈائریکٹر جنرل خمّار مرابط نے کی، جس میں چین، رومانیہ، روس، سلوواکیہ کے ماہرین اور آئی اے ای اے کے ارکان شامل تھے۔ جائزے کے بعد ٹیم نے پاکستان کے نیوکلیئر سیکیورٹی نظام کو مزید بہتر بنانے کے لیے کئی تجاویز بھی پیش کیں اور ریگولیٹری سطح پر اچھے اقدامات کی تعریف کی۔ مشن کی اختتامی تقریب کے دوران گفتگو کرتے ہوئے آئی اے ای اے کی ڈپٹی ڈائریکٹر جنرل اور شعبہ نیوکلیئر سیفٹی اینڈ سیکیورٹی کی سربراہ کرائن ہیریوو نے کہا کہ پاکستان میں پہلا آئی پی پاس مشن کامیابی سے مکمل ہو گیا ہے جو ملک کے پختہ عزم کو ظاہر کرتا ہے۔ دوسری جانب پاکستان نیوکلیئر ریگولیٹری اتھارٹی (پی این آر اے) کے چیئرمین ضیاء حسین شاہ نے کہا کہ اس بین الاقوامی مشن کی میزبانی سے یہ واضح ہوتا ہے کہ پاکستان اپنی تنصیبات اور سرگرمیوں میں نیوکلیئر سیکیورٹی کے اعلیٰ ترین معیار کو برقرار رکھنے کے لیے پرعزم ہے۔ مشن کے دوران ماہرین نے پی این آر اے، پاکستان اٹامک انرجی کمیشن اور دیگر قومی شراکت داروں کے حکام سے ملاقاتیں کیں اور کراچی نیوکلیئر پاور جنریٹنگ اسٹیشن پر کینپ ڈی کمشننگ پروجیکٹ کا دورہ بھی کیا۔ اس کے علاوہ، پی این آر اے نے آئی اے ای اے کے اشتراک سے نیوکلیئر سیفٹی کے لیے تجارتی درجے کے آلات کے انتخاب سے متعلق پانچ روزہ قومی ورکشاپ کا بھی کامیابی سے انعقاد کیا، جس کا مقصد سپلائی چین اور نیوکلیئر سیفٹی کی صلاحیتوں کو مزید مستحکم کرنا تھا۔